集資200萬 李泳豪旺角燒肉店結業 原鋪位減價近2成轉租 老豆鼎爺都試過食店執笠

唔少藝人開食肆當副業，不過近年本港消費市道麻麻，去年MIRROR成員Jer（柳應廷）、Jeremy(李駿傑）、AK江𤒹生等人投資開食肆都疑似遇人不淑執笠收場。

因為主持《鼎爺廚房》而走紅嘅李家鼎，食住個勢開私房菜館搵真銀，而鼎爺細仔李泳豪2018年都仿傚老豆，集資200萬喺旺角白布街開設立食和牛燒肉店，主打日本九州黑毛和牛，顧客企住食極casual，而且可以揀不同部位牛肉，點一塊都得。

有藝人名氣又有綽頭，似乎有得做，不過據區內地產界人士爆料，原來泳豪間燒肉店早前已經結業，而且去年一度以15萬元頂手費將生意易手，似乎捱咗一段時間先至投降。據知，該個1600平方呎嘅鋪位，原本月租8萬3千元，而家業主減租約2成至6萬8，轉租俾另一間食肆。

豪仔今鋪出師不利，查實佢老豆鼎爺嘅飲食生意都唔係一帆風順。《鼎爺廚房》2016年跑出之後，李家鼎2年間開咗3間食肆，但到2019年受社會運動影響，其中一間位於中環嘅食府，開業一年多啲就宣布喺2019年11月結業。之後新冠疫情來襲，私房菜館生意一度急挫8成，更要推出288元一位午市套餐求生。捱過疫情後，鼎爺飲食生意重上軌道，去年有報導指設於灣仔嘅私房菜館以月租18萬續租。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！