雙生陌生人｜陳庭欣與富貴男友屢傳婚訊 由屋邨升呢住三千呎洋房

2010年港姐冠軍陳庭欣（Toby）唔經唔覺入行12年，多年來主要都係做主持，雖然拍劇集機會唔算多，不過喺《法網狙擊》色誘謝天華、《致命復活》中飾演郭晉安小三後慘遭侵犯、《踩過界》中飾演跨性別人士潘安（Annie）等都備受網民關注。近日陳庭欣喺無綫新劇《雙生陌生人 》飾演嘅Kate，誤會扮演小提琴家馬范范（黃俊豪飾）係佢失蹤咗五年嘅男朋友，情不自禁更向對方獻吻，點知唔小心撞爛對方嘅名貴小提琴，而鬧上法庭。喺法庭上，佢終認清黃俊豪唔係佢失蹤男友，聲淚俱下接受失蹤男友已離世亦向黃俊豪道歉。依場戲陳庭欣演得好虐心令人痛心，獲觀眾大讚演技有進步！

陳庭欣感情生活比演藝事業精彩好多，陳庭欣曾與翟威廉地下情拍拖5年，之後因看不到二人有將來而分手，之後同律師唐偉倫（Warren）拍拖。2018年佢同擁10億身家嘅彩豐行老闆楊振源 （Benny）一齊，生活變得越來越富貴，由屋邨搬到超過3000呎嘅沙田九肚山洋房，屋企裝修豪華，勁高樓底放上巨型燈飾，大理石大圓餐桌，仲有天台、車庫及花園。二人拍拖後經常高調放閃，2019年Benny更投資1,200萬俾陳庭欣開設健身中心，不過兩人感情出現暗湧，Benny試過同其他人傳緋聞，亦指佢同陳庭欣好友阿Yu有染。之後，有傳男方為咗氹Toby，送咗一個位於黃大仙價值千萬嘅單位，而Toby亦相信Benny唔會出軌，喺IG上載合照放閃，證明其正印地位好穩陣。

有知情人士指陳庭欣心急嫁入豪門，就算男友被揭花弗，佢都只好忍氣吞聲，仲話佢喺男友嘅公司及健身公司都有線眼，佢就算一早收到風都唔敢問男友，唯有自己得閒就去踩場。直到事件爆出後，Toby好唔開心，返TVB開工都冇厘神氣，有苦自己知。網民對於佢屢次傳出結婚消息，直指佢入豪門嘅夢未必可以成真。不過Toby就表示自己唔太鍾意小朋友，再加上男友離過婚嘅關係，所以佢冇諗過結婚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！