難忘一齊開枱食飯 排隊再拍楊紫瓊 甄子丹：可能30年後

「宇宙最強」甄子丹昨日出席活動，對於舊拍檔楊紫瓊勇奪奧斯卡影后為華人爭光，他為好友開心之餘，又勾起不少昔日合作的美好回憶，但講到再結片緣，他笑言可能排隊要排到30年後！

影星甄子丹與太太汪詩詩、陳家樂、湯怡等昨日出席馬場活動，子丹剛參與奧斯卡頒獎禮返港，對於楊紫瓊封后表示高興：「佢攞獎嗰刻，我哋開心到彈起，佢係值得，咁多年都堅持。關繼威攞男配角嘅感言都好感動，聽到眼濕濕，咁多華人攞獎，破晒紀錄。（有冇約楊紫瓊慶祝？）有，不過佢好忙，全世界都同佢慶祝，我哋要排隊。（勾起好多回憶？）係，當年同佢拍《詠春》、《新流星蝴蝶劍》，一齊打麻雀、食飯，拍戲前前後後相聚好開心，估唔到佢有一日可以為華人同女性爭光。（再合作？）可能要排到30年後喎！」

談及電影《殺神JOHN WICK 4》男星Lance Reddick逝世，有份參演的子丹表示與對方沒對手戲，但感到震驚及難過。至於曾跟肢解案受害者蔡天鳳合照，他表示不認識對方：「佢係當晚其中一個贊助，對於合照我向來有求必應，任何人有呢啲遭遇，都會為佢感到難過。」

陳家樂婚前急收身

下月結婚的家樂透露過幾天便會過大禮，他自爆宣布婚期後獲不少贊助商主動聯絡，現正積極收身：「着西裝肥少少就唔好睇，Shiga（連詩雅）瘦到我見猶憐，我媽媽同嫲嫲都好擔心佢太瘦，經常叫佢食多啲，但佢有啲減肥減上癮，所以我都要跟上步伐努力Keep Fit。」湯怡則透露歲半女兒剛考入心儀學校，9月便上學前班，令她放下心頭大石。