雲浩影Cloud鬧市初嚐行為藝術 還原《慢性分手》MV梳化睇書歎茶 享受自我平靜世界

雲浩影（Cloud）最近推出新歌《慢性分手》，MV更成為YouTube熱門音樂影片之一，深受樂迷喜愛。為宣傳新歌，Cloud日前在繁忙的銅鑼灣行人專用區，進行一項行為藝術。路中間擺放了MV中具代表性的藍色梳化和小茶几，她獨自坐在梳化上聽歌、睇書和歎茶。即使被逾百位「迷雲黨」（Cloud粉絲暱稱）及途人圍觀拍照，但Cloud仍然無視一切，享受着自己的小空間，她更投入到除鞋跪坐椅上。一小時的活動結束後，Cloud高呼有趣好玩，她說：「好得意，感覺到身邊嘅嘢郁緊，自己好似有個罩罩住嘅空間！」

活動開始前，路中間只有梳化及茶几，但已被眼利的「迷雲黨」發現。而《慢性分手》MV導演，即去年奪得金像獎最佳剪接的李謙明路過時，同樣看到熟口熟面的場景，得知今次的行為藝術後亦有拍照留念。Cloud隨後拿着一杯熱茶現身，她不發一言直接坐在梳化上，現場播放着《慢性分手》。Cloud無視周遭的人和事，戴上耳機靜靜地聽歌，並專心看着手上的英文書《The Things You Can See Only When You Slow Down: How to be Calm in a Busy World》，享受繁華鬧市中的自我寧靜世界。早前澳門YouTube節目《歡樂馬介休Bacalhau》邀請Cloud玩遊戲，節目主持之一的Rico路過，剛好完成活動的Cloud邀請對方一齊坐梳化，感受一下。

Cloud事後解釋說：「今日呢個行為藝術，喺鬧市中還原《慢性分手》MV場景，製造一個自己嘅小空間睇書。（好玩嗎？）幾有趣，喺一個繁華嘅城市裏，感覺只得自己嘅平靜空間。多謝大家陪住我，我本來諗住會睇晒成本書，結果睇唔晒，返去慢慢睇。」她坦言之前有擔心，說：「最初擔心自己會分心，我唔敢同大家Say Hi，原來入咗個世界，係可以，試下就知，好得意，身邊嘅嘢感覺到係郁緊，自己好似有個罩住嘅空間！」至於手上的書本，她表示是朋友介紹：「呢本書係講How to be Calm in a Busy World，忙碌世界點樣去活得平靜，亦講咗好多嘢，要思考，喺呢個情況睇呢本書，幾有味道，幾有感覺！聽住自己首歌，幾啱Feel！」活動期間見到Cloud打呵欠，她笑說：「太舒服啦，做返自己嘛，我平時睇書都會打喊露㗎！」