雅虎香港新聞 電影LOL︳已洗27億！《狂野時速10》嚴重超支 成本拍得住《復仇者聯盟》
《狂野時速10》幕後同套戲一樣精彩，早前系列大腦林詣彬(Justin Lin）開拍10日後突然劈炮唔拍，明示暗示頂唔順男主角Vin Diesel，為保心靈及精神健康寧願放棄多年心血同勁大舊酬金。
另一邊廂，Vin Diesel同系列另一要角「The Rock」Dwayne Johnson 不和，兩個大隻佬喺公開場合又或自已嘅社交媒體都毫不留手地開拖。為咗票房Vin Diesel都伸過吓橄欖枝，不過成為「黑亞當」嘅Dwayne Johson就無咩意願回歸《狂野時速》系列。
《狂》花生不斷，食極都有，據外媒The Wrap報導《狂10》嚴重超出預算，戲未拍完保守估計已經最少用咗3.4億美金（將近27億港元！），即係有幾貴？《復仇者聯盟4:終局之戰》、《復仇者聯盟2:奧創紀元》製作費算得上數一數二貴，超多一線巨星主演加上戲服、電腦特效超級多，埋單每套用咗3.65億美元拍攝，《狂10》睇勢有機會追平！
而上一集去埋太空嘅《F9》都只係用咗2億美金拍，埋單全球收7.26億，點都叫有賺。《狂10》依家駛多成倍咁滯，連外媒都擔心片商環球會唔會蝕本！其實都騎虎難下，《狂10》鐵定要拍，邊會估到開機10日創作大腦突然劈炮，局住停工臨急臨忙物色新導演Louis Leterrier上任，無端端駛多舊錢。
疫情關係，拍攝期間嘅防疫措施亦係成本，加上男主角Vin Diesel跟住系列越嚟越有話事權，份糧又越嚟越大，剩係佢片酬2000萬美金（約1.5億港元），而且除咗系列固有班底嘅2位奧斯卡影后Helen Mirren、Charlize Theron外，今集再加入「水行俠」Jason Momoa同「Marvel隊長」Brie Larson等巨星，製作預算大大提高！
《狂野時速》Fans對於高價製作預算另有見解，認為花費鉅資，故事一定有驚喜，唔少Fans推論今集會玩時空倒流回到過去，同已死嘅角色再有交集！有一部份人覺得會有恐龍出現，其實飛車都飛到上太空，《狂10》又真係有無限可能，被恐龍追？小兒科啦！
更多電影文章
電影LOL 今期睇咩戲︳忽然心動／神速特攻隊／她說／世間有她／海的盡頭是草原／記憶。復仇
電影LOL︳Anne Hathaway《走佬俏公主》拍第3集 展現公主中女生活？
電影LOL︳迪士尼大地震 前CEO Bob Iger回巢 現任衰呢2單大嘢要敗走？
電影LOL︳Lindsay Lohan變洋版李婉華 拍聖誕愛情片搏反彈
電影LOL︳預告繼續爆肌繼續跳 《光豬舞壯士3》出年情人節同你搶女友
電影LOL︳新海誠極催淚新作《鈴芽的門鎖》日本開畫打低《黑豹2》
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
