雅虎香港新聞 【電影LOL】下一個兒童界巨星 會係呢隻Clifford The Big Red Dog?
做影視界要搵到食，其中一個門路︰賺細路仔錢！君不見無數受歡迎嘅卡通角色franchise，可以衍生出幾多產品同演出，扑中的話真係賺到笑。而家香港家長為求小朋友英文好，都會被歐美出品嘅卡通小朋友睇，Paw Patrol、LOL Surprise、Captain Underpants喺兒童界好hit架～
至於下一個瘋魔一班「塞豆窿」嘅係咪呢隻紅色狗狗Clifford？
Clifford The Big Red Dog係歷史悠久嘅兒童繪本，1963年首度出版，故事圍繞一隻身型變得龐大嘅紅色拉布拉多犬Clifford以及佢嘅小主人Emily所發生嘅事。2000年Clifford The Big Red Dog喺播放《芝麻街》嘅美國公共廣播頻道PBS推出電視版卡通，喺北美長大嘅大小朋友，可能都認得呢隻狗狗。
點解Clifford會變成紅色？原作者Norman Bridwell話，佢得返紅色顏料可以用，而且覺得紅色同藍色天空綠草地好夾，於是就將狗狗畫成紅色。咁Clifford有幾大隻？有網友好認真咁計，估計有成7.5米高，甚至連佢嘅便便有幾大篤都計埋……話有一架垃圾車咁大！
至於最大謎團︰點解Clifford會變大？呢個講法眾說紛紜，電視版Clifford The Big Red Dog有首兒歌嘅歌詞提到，因為Emily嘅愛，令Clifford變成小朋友心目中嘅大大狗狗好朋友。而Clifford變大之謎，將會喺暫定下年11月上映嘅Clifford The Big Red Dog真人電影版解開！
片商派拉蒙日前推出Clifford The Big Red Dog電影20秒預告片，只係見到以電腦特技整出嚟嘅Clifford，可能係汲取《超音鼠》真人電影版被網友大鬧將超音鼠整得肉酸，結果要駛一大筆錢大幅修改嘅教訓，所以出條片先試一試水溫啦，好在暫時都未有負評。至於故事，就係講述小女孩Emily喺媽咪出外公幹期間，得到動物義工送贈嘅紅色小狗，點知一夜之間，小狗變成10呎高，對住喺紐約大城市小公寓嘅Emily實在係大件事！
疫情之下，好難話得埋Clifford The Big Red Dog電影能否如期上映，不過呢類片種即使唔上戲院，放喺串流平台反而仲ok，因為夠晒入屋，而且Clifford 故事歷史悠久，大人小朋友都喜歡，似乎唔驚疫情影響收入噃！
更多電影文章
【電影LOL】今個星期睇咩戲 《熱血合唱團》《阿索的故事》《特務打爆機》《攣愛季節》《EMMA：上流貴族》《美好年華》
【電影LOL】《大白鯊》25呎道具鯊魚復修完成 放入電影博物館
【電影LOL】范冰冰聯同國際級女星壓陣 The 355押後一年上映
【電影LOL】香港電影金馬獎得獎 《夜更》《迷航》2種抗爭角度
