【電影LOL】內地賀歲檔大收 《唐人街探案3》破《復仇者聯盟4》紀錄

餓咗好耐,香港嘅戲院終於喺18日重開,暫時票房成績唔錯!由邱禮濤導演執導、劉德華、劉青雲主演嘅《拆彈專家2》2日收245萬成為票房冠軍,《神奇女俠1984》排第2收165萬,《靈魂奇遇記》排第3收104萬,有啲意外係宣傳做得好足又有noise嘅《狂舞派3》竟然包尾收71萬。希望《狂3》之後可以追返上嚟啦。

香港今年因為防疫措施而停業,白白浪費咗個賀歲黃金檔期;反觀一河之隔嘅內地,戲院早早回復正常營業,結果今個牛年賀歲票房破哂紀錄,《唐人街探案3》截至21日累計人民幣39.39億成為票房冠軍!

原本係上年賀歲片,延至今個月12日上映嘅《唐》,擺足1年亦無損其受歡迎程度,一開畫單日勁收10.42億人民幣,破哂內地單日預售、開畫票房及單日票房紀錄,用咗11個鐘就破10億票房,兼打破《復仇者聯盟4:終極之戰》內地最高開畫票房7.28億嘅紀錄!

根據《時光網》報導,《唐3》首日超過《復4》北美開畫1.57億美金嘅紀錄,不過內地無論戲院數目及人口都多過北美地區,所以單睇個別地區開畫票房意義不大,《復4》唔止北美勁收,喺全球各地都好收得!

另一套賀歲片《你好!李煥英》票房無破紀錄,不過因為超好口碑而急起直追,票房累計37.66億人民幣,睇形勢有機會反超前,埋單應該收得勁過《唐3》!《你》為內地喜劇演員賈玲處女導演作,自導自演返自己嘅故事。故事講述賈玲穿越到80年代重遇年輕時嘅媽媽-李煥英,賈用盡辦法為媽媽完夢。賈玲通過電影一圓母親因為意外突然離世嘅遺憾,由心出發加上又喊又笑嘅情節,造就極好口碑,意外成為農曆年黑馬!

賀歲檔有人歡喜有人愁,《唐3》、《你》2套電影破紀錄收接近80億票房,不過同期其他電影就要出文「求排片」。好似有劉德華主演嘅《人潮洶湧》因為場次極少,票房收得2.7億,導演饒曉志微博求戲院加場次!另一套造型、電腦特效都花費不菲嘅《侍神令》同樣慘淡,就算有陳坤、周迅同內地勁hit嘅陳偉霆主演都幫唔到,票房暫時得2.3億,場次仲越嚟越少添!

內地高開嘅《唐人街探案3》今個星期會喺香港上映,系列以往喺香港反映一般,今集有妻夫木聰、長澤正美、鈴木保奈美及泰國Tony Jaa等港人熟悉嘅影星坐陣,或者有助吸引香港觀眾入場?

更多電影文章

【電影LOL】戲院重開 各大院線優惠一覽

【電影LOL.戲院重開】今個星期睇咩戲 大量新片湧住上

【電影LOL】周杰倫《不能說的秘密》拍韓國版 EXO D.O演男主角

【電影LOL】Amazon拍《史密夫決戰史密妻》劇集版 唔搵型男索女做主角?!

【電影LOL】反修例紀錄片《Do Not Split不割席》入圍奧斯卡紀錄短片十強

【電影LOL】冇賀歲片 上Netflix睇台片 《孤味》戲味濃 《同學麥娜絲》麻甩佬的無奈

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!