雅虎香港新聞 【電影LOL】新片Minari講美國新移民 居然唔當係美國片 金球獎準則被狠批
作為美國奧斯卡前哨戰同賽果風向嘅金球獎，正式提名名單將於下年2月3日公佈，不過名單未出就被鬧！奧斯卡被人詬病賽果偏向白人口味、作風守舊，近年努力洗底，連得獎名單都識睇住風頭火勢，被人話「白人至上」嗰年，最佳影片立即頒俾講述黑人音樂家經歷《綠簿旅友》；上年種族議題大熱，南韓電影《上流寄生族》即刻成為大贏家，囊括最佳影片、最佳國際影片（原名最佳外語片）等多個大獎！
奧斯卡盡力與時並重，不過由93位Hollywood Foreign Press Association會員組成嘅金球獎，就似乎繼續原地踏步。電影只要符合入圍要求就可以報名，不過大會可以更改報名類別，以往就試過將原本「最佳女配角」大熱嘅Catherine Zeta-Jones（《芝加哥》）搬去「最佳女主角」，結果同同片嘅Renee Zellweger對撼，最終輸埋！
而近日金球獎被炮轟就因為今年於Sundance影展贏得U.S. Dramatic Audience Award及評審團大獎，由Lee Issac Chung執導、《燒失樂園》The Walking Dead男星Steven Yeun主演嘅電影Minari，因為對白有一半為韓文而唔被當成美國電影，無緣角逐「最佳電影」，只能報名「最佳外語片」！
Minari以導演真實經驗為原型，講述一家人由南韓移民至美國阿肯色州尋找美國夢，作為新移民由零開始嘅掙扎與文化衝撃。電影由男主角Steven Yeun、A24及畢彼特嘅Plan B共同監制出品，除咗太太Monica及嫲嫲一角，分別由韓劇《青春時代》女星韓藝璃及近年憑綜藝節目《尹食堂》人氣急升嘅老戲骨尹汝貞飾演外，其他都係美籍演員。台前幕後都係美國人，連故事都發生喺美國，居然唔係美國電影？
《別告訴她》導演狠批︰除咗原住民，美國全部人都係移民
消息一出引起美藉亞裔演藝人士不滿，Lost男星Daniel Kim發文指金球報名準則同「叫人滾回你國家」（Being told to go back to your country when that country is actually America)無分別；而上年遭受同一待遇、《別告訴她》導演王子逸感同身受，氣憤發言「Minari係美國新移民故事。除咗原住民，全部人都係移民或移民後裔，英文唔係原住語言，我受夠美藉亞裔永遠被當成外人」！
連美國眾議院議員劉雲平Ted Lieu都炮轟金球獎不如索性改名做「僅限英語人士的金球獎」（Golden Only For English Speaking People）！話哂美國叫得自己做大熔爐咩人種都有，加上近年平權、種族議題意識抬頭，早前black live matter運動令唔少美國人重新檢視歷史，推倒過往權威。只可以話成立已久嘅金球獎對世事太遲鈍，以為有權威就可以繼續行舊有制度？
更多電影文章
【電影LOL】玉女無以為繼 Vanessa Hudgens拍聖誕賀節片殺出血路
【電影LOL】沙拉保夫性醜聞纏身 Netflix極速割蓆新片除名
【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品
