雅虎香港新聞 電影LOL︳《芭比》失落奧斯卡最佳導演女主角提名話題發酵 希拉莉楊紫瓊發聲撐
早幾日奧斯卡提名名單公布，《奧本海默》以13項入圍成為本屆之冠， 另一套大片《芭比Barbie》只有8項。最令人跌眼鏡係，《芭比》女主角Margot Robbie爆冷無份入圍角逐影后，而《芭》導演Greta Gerwig同樣失落最佳導演提名。同片演Ken嘅Ryan Gosling雖然有份入圍角逐最佳男配角，但似乎唔多高興，仲喺提名公布後發聲明，對於Margot Robbie同Greta Gerwig不獲提名感到失望。
Greta Gerwig將《芭比》由公仔變成言之有物嘅電影版，而且叫好叫座，本來工夫就唔簡單，居然冇提名難免令人有所聯想。向來奧斯卡同金球獎都被人詬病係白人兼男性主導，多年來只有7位女性獲提名最佳導演，勝出嘅只有3位。推崇女性自主、班底大部份係女性嘅《芭比》唔對評審胃口唔出奇，偏偏導演同有份促成呢套戲嘅Margot Robbie都冇提名，反觀片中最多戲份嘅男人Ryan Gosling就入圍，唔……
喺Ryan Gosling發聲之後，美國前國務卿及前第一夫人希拉莉，都喺社交平台發文力撐2人，寫道「即使贏咗票房但喺頒獎禮空手而回，數以百萬計嘅fans都係咁愛你」。上年贏得影后寶座嘅楊紫瓊近期為Netflix影集The Brothers Sun接受訪問時，被問到點睇Margot Robbie同Greta Gerwig無份爭獎時就話，獎碰競爭好激烈，冇一套戲保證入圍，但好在Barbie有份角逐最佳電影，不過難免令人諗到『點解有份提名最佳電影，導演同女主角又冇份嘅呢？』。楊都強調，《芭比》係套相當成功嘅作品。至於喺《芭》演另一個Ken嘅劉思慕都有發文聲援Margot Robbie同Greta Gerwig。
不過憑《人鬼情未了》獲得最佳女配角嘅黑人女星胡比高拔，就喺主持嘅talk show叫大家唔好放大件事，佢話勝敗乃兵家常事，今次Margot Robbie同Greta Gerwig冇提名唔係爆冷，亦唔關主辦單位高層事，因為成個提名名單係由評審投出嚟。
更多電影文章
電影LOL 今期睇咩戲︳祖宗膠戰外星人2／反貪風暴之加密危機／鬼聲陰／新活日常／莫斯科行動／小曉／三大隊／味遊心窩
電影LOL︳《奧本海默》13提名冠絕本屆奧斯卡 《芭比》Margot Robbie爆冷無緣爭影后
電影LOL︳奧利華史東開地圖炮 鬧Ryan Gosling拍《芭比》嘥時間 John Wick睇到瞓著
電影LOL︳DC動漫人物版權陸續失效 《超人》2034年到期準備被惡搞
電影LOL︳Adam Sandler繼續行演技派路線 新片Spaceman同外星蜘蛛傾心事
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
