雅虎香港新聞 電影LOL︳內地愛情片《一閃一閃亮星星》搞戲院飄雪效果出事 觀眾遇「雪崩」一身泡
內地睇戲多花臣，早排先有戲院推出一邊打邊爐一邊睇戲嘅玩法，而家又有新搞作。
內地愛情片《一閃一閃亮星星》近期上映，其中一個賣點係喺12月30日13點14分嘅「下雪場」場次，會配合劇情，喺尾聲出現飄雪效果（查實係細細粒嘅泡泡），成功製造話題，而「下雪場」嘅戲飛一早賣晒。
真係好浪漫呀……本來。有網民喺小紅書分享，部份影院嘅飄雪效果操作不良，結果有觀眾一身都係泡，好似沖泡泡浴咁，仲形容人地「遇上雪崩」。
最好笑係，仲有戲院唔係以機器製造噴雪，而係以人手 － 到嗰場落雪戲嗰陣，幾個職員各就各位，3、2、1，拎住支手提罐裝雪花嚟噴！甚至有觀眾反映，佢地間戲院係派罐裝雪花俾觀眾，結果有人貪玩周圍噴。而有戲院就派定雨衣俾觀眾，成件事由浪漫變到騎呢，甚至被網民大呼尷尬，假如我係觀眾，應該會係好笑多於感動。
《一閃一閃亮星星》本來係一套網劇，故事以三十歲女子林北星意外重返十八歲，本來想重考高考追夢，但因為一個叫張萬森嘅高材男生而打亂計劃。後來，張萬森意外身亡，林北星於是著手調查萬森死因，先發現當年素不相識嘅萬森原來對自己痴心一片。劇集版《一閃一閃亮星星》2022年推出時頗受歡迎，劇中張萬森為咗林北星而死，林北星一個人喺雪夜街頭講「張萬森，下雪了。你還好嗎，我好想你啊」，令唔少觀眾動容。片商見反應好於是開拍電影版，故事改為由高中時嘅張萬森角度出發，因為一場演唱會意外而令林北星遭遇不幸，今次到張萬森穿越時空回到出事前。落雪橋觀眾buy，宣傳公司於是以呢個綽頭搞「下雪場」吸客。
尷尬還尷尬，但係根據內地報導，《一閃一閃亮星星》成為內地元旦檔電影票房之冠，截至元旦日全國總收近5.8億人民幣。相比之下，有梁朝偉劉德華主演嘅《金手指》票房約1.65億元，《一》領先一大截。
更多電影文章
電影LOL 今期睇咩戲︳金手指／劇場版 城市獵人 天使之淚／無邪之境
電影LOL︳香港戲院聖誕檔票房加埋唔夠2千萬破20年新低 賀歲檔靠鏡仔救市？
電影LOL︳荷里活聖誕檔票房甩轆 《水行俠與失落王國》靠中國內地票房保住DC招牌
電影LOL︳伊朗導演拍特朗普青年時期經歷 男主角係荷里活扮嘢王？
電影LOL︳影壇新金童玉女 《芭比Barbie》導演Greta出任康城影展評審團主席 男友Noah執導佐治古尼新片
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
