雅虎香港新聞 電影LOL︳香港戲院聖誕檔票房加埋唔夠2千萬破20年新低 賀歲檔靠鏡仔救市？
尋日先講完北美聖誕檔期票房有幾麻麻，而香港影業協會及香港戲院商會屬下嘅香港票房有限公司，就公布今年聖誕檔期（24－26日）全港戲院票房收入只有1960萬元，比去年跌4成。唔計受疫情影響嗰2年，疫情前嘅2019年香港市面氣氛仍受社會運動影響，嗰年聖誕票房都有2942萬，比起前一年都跌咗近3成。但係今年連2千萬都冇，據統計應該係20年來最低，扣除埋通漲因素，就知條數幾差。
拆開條數嚟睇，今個聖誕檔嘅票房冠軍係《水行俠與失落王國》，3日加埋收近660萬，對比以往大片聖誕檔單日起碼收3百萬嚟比，真係差一截。第2位係《Wonka 旺卡》，收347萬；迪士尼動畫《星願奇緣》以325萬排第3。港片成績最好嘅係上映逾月嘅《年少日記》，收到130萬。
今年聖誕檔陣容的確唔夠勁，《水行俠》雖則係大片但缺乏「通殺」條件，就連北美都唔見得一支獨秀。加上疫情後香港人一有長假就出外消費，本地戲院市道冷清係可以預期。不過影業協會理事長洪祖星都話，票房咁差連佢都估唔到，亦唔知係咩原因。另一位電影界前輩黃百鳴就分析，三年疫情後香港以至荷里活片商都唔敢開大片，但佢表示疫情過去，亦開始有大片製作中，估計出年會比今年好。
下一個黃金檔期係農曆新年，估計港人外遊風氣依然未減，戲院票房點都受影響。但係龍年賀歲檔單係港片陣容已經好過聖誕檔，已知有近乎原班人馬、只欠大佬黃子華嘅《飯戲攻心2》；郭富城、林家棟、任賢齊扮演「廢中」嘅《臨時劫案》，仲有由姜濤、Anson Lo及Edan主演嘅《盜月者》，各有賣點。「鏡仔」向來有叫座力，鏡粉亦向來有財力同動員能力，票房唔慌曳！
更多電影文章
電影LOL 今期睇咩戲︳水行俠與失落王國／星願奇緣／河邊的錯誤／RENAISSANCE: A FILM BY BEYONCÉ
電影LOL︳荷里活聖誕檔票房甩轆 《水行俠與失落王國》靠中國內地票房保住DC招牌
電影LOL︳伊朗導演拍特朗普青年時期經歷 男主角係荷里活扮嘢王？
電影LOL︳影壇新金童玉女 《芭比Barbie》導演Greta出任康城影展評審團主席 男友Noah執導佐治古尼新片
電影LOL︳Barbie大賣 Mattel籌拍American Girl真人版電影 幕後主腦拍過恐怖片！
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
