電影LOL︳吳宇森新片Silent Night 男主角為啞巴角色禁言點知極速破功

吳宇森導演相隔20年重返荷里活執導新片Silent Night，電影由《自殺特攻》大隻男星Joel Kinnaman主演，全片零對白。故事講述由Joel飾演嘅Godlock，年幼嘅兒子因為幫派鬥爭意外中彈無辜身亡，為兒子復仇卻反被打成重傷連聲都無埋！Godlock潛伏數年磨鍊自己，再次於平安夜出動為兒子報仇！

「復仇」係電影重頭戲，不過Silent Night動作場面有別吳導以往作品，近日導演為電影宣傳接受訪問時表示，以往作品動作場面主要為刺激娛樂，新作嘅動作場面則為劇情及角色服務，所以電影用咗大量篇幅交代Godlock為復仇而進行一系列艱苦訓練，增強後半部份打入幫派、殺到血流成河嘅可信性。

Silent Night一樣打戲連場，吳導依家追求真情實感，無飛車爆破高空跳過，所以睇得更痛！吳宇森表示當初確定由Joel Kinnaman主演亦因為Joel好有人味，夠真實，並盛讚Joel非常聰明。戲內男主角入仔仔房間一幕，原定上演溫馨父子回憶，後經Joel建議導演有感效果更好，即場採用改成男主喺仔仔房瞓著，夢中再次見到死去嘅兒子，更感人！

男主角Joel Kinnaman亦係個相當有趣嘅人，佢接受The Tonight Show時表示，佢原本諗住實行方法演技，拍戲拍幾耐佢就唔講嘢幾耐，事前廢盡唇舌同未婚妻Gale溝通佢將會斷聯數月，Gale無奈接受。點知未開機就破功，Joel喺酒店覺得寂寞，最後決定打電話俾Gale！退兩步打算到片場就唔講嘢，點知見到工作人員有講有笑好開心，佢又抵唔住寂寞講埋一份，最後方法演技只適用於化妝間到片場嘅車程度！

而導演較早前透露過想為1997年作品《喋血雙雄》拍續集，不過《喋》續集已確定由《哥斯拉大戰金剛》導演Adam Wingard及《死亡習作：咒怨森林》編劇Simon Barrett製作，故事將延續首集Nicolas Cage及John Travolta嘅角色發展。

吳導表示不解《喋》續集發展，覺得兩個角色嘅故事唔應該延續，佢曾經建議片廠將續集改由2位女星擔任，講述佢哋換面之後嘅遭遇，明顯電影公司唔Buy條橋，索性搵其他人接手！不過導演唔接拍都未必係壞事，《喋血雙雄》2位男主由中生變老生，動作戲拍唔到幾多，拍出嚟效果麻麻仲衰過唔拍！

更多電影文章

電影LOL 今期睇咩戲︳不日成婚2／女鬼橋2：怨鬼樓／一個人的朝聖／迷失幸運兒／如果主子會說話

電影LOL︳隻鬼成層樓咁高！全球首部IMAX泰國鬼片Death Whisperer沉浸式嚇死你

電影LOL︳羅拔唐尼「翻生」再演鐵甲奇俠救票房？Marvel高層正式落閘

電影LOL︳Marvel傳有意換人執導《雷神奇俠》導演立即割席︰為錢先拍

電影LOL︳《吸血新世紀》導演點名2新生代影星演新一代吸血鬼情侶 掀起疑似翻拍話題

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！