電影LOL︳隻鬼成層樓咁高！全球首部IMAX泰國鬼片Death Whisperer沉浸式嚇死你

不嬲都話泰國人拍鬼片有一手，之前介紹過嘅The Undertaker（台譯《送葬人》），上映未夠一個月就收到7億泰銖票房，衝上泰國史上最賣座電影亞軍寶座！就連泰國總理社他都拉埋內閣官員撐場兼出post大讚。今期又有另一套！

有睇IMAX片都知，個銀幕幾層樓咁高，加埋音響效果，官能刺激一流，難怪Nolan拍《奧本海默》都堅持以IMAX規格製作。而號稱係全球首部以IMAX拍攝嘅泰國電影，果然係泰片強項 － 鬼片！以前就話睇超級英雄片先要IMAX，而家連鬼片都拍IMAX，諗下都覺得打冷震。

呢套大製作Death Whisperer改編自泰北一個家族70年代嘅真實經歷。一名少女半夜聽到疑似「聽住呀」嘅怪聲幾日後離奇身亡，消息好快喺小村莊傳開。少女嘅大哥得知消息後決定由軍營返老家照顧家人。但係之後輪到細妹放學時遇到一個黑衣女子後，突然性情大變，甚至撞邪咁重複叫喊「聽住呀」……呢個傳聞唔少泰國人都聽過，而且改編過做小說，甚至家族後人上youtube節目受訪條片，都有1400萬次點擊。

故事同傳統「鬼上身」靈幻邪片類似，但係想像一下，用IMAX巨幕睇鬼片，隻鬼彈出嚟隨時成層樓咁高……可能因為大家都想體驗下，Death Whisperer喺泰國票房相當理想，十月底開畫當日票房已經係全年最高，上映5日就收3億泰銖，正邁向成為泰國史上最賣座鬼片之路。而家上映1個月多少少，導演受訪時已經話好大機會拍續集。

台灣片商將會安排明年1月初喺IMAX影院上映Death Whisperer，片名譯作《鬼聲泣》。假如香港有得睇，都真係要體驗下巨幕睇鬼片係咪會驚多10倍！

更多電影文章

電影LOL 今期睇咩戲︳不日成婚2／女鬼橋2：怨鬼樓／一個人的朝聖／迷失幸運兒／如果主子會說話

電影LOL︳Marvel傳有意換人執導《雷神奇俠》導演立即割席︰為錢先拍

電影LOL︳《吸血新世紀》導演點名2新生代影星演新一代吸血鬼情侶 掀起疑似翻拍話題

電影LOL︳Netflix遇電騙？《浪人47》導演袋走4億製作費自肥炒股買跑車

電影LOL︳《奪命狂呼7》女星撐巴勒斯坦被炒 女主角Jenna Ortega翌日辭演

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！