電影LOL︳Netflix遇電騙？《浪人47》導演袋走4億製作費自肥炒股買跑車

「電騙」唔止解作「電話騙案」，仲可以係「電影界騙徒」……

是咁的，執導奇洛李維斯主演電影《浪人47》嘅導演Carl Erik Rinsch，行內名氣唔大，加上《浪》票房同影評都普通，本來冇咩人為意。而喺2018年左右，各串流平台業務開始蓬勃，對內容需求極大。Carl Erik Rinsch用自己錢拍咗堆「片花」，向各平台sell一套關於人工製造人類（人造人？）嘅sci-fi影集，連劇本都未有，但反應竟然超好，甚至出現掟錢搶橋嘅情況。

Carl導本來同意同Amazon合作，但後來Netflix中途殺出，除咗銀彈攻勢，仲加多樣罕見條件－導演有剪接話事權。結果Netflix以4千4百萬美元投到個project，定名為Conquest，諗住可以大獲好評、開season 2、無限擴張……結果係騙局開始。

據首先爆料嘅《紐約時報》報導，Carl導簽完約之後個人變得好飄，甚至拎Netflix畀嘅製作費炒股，結果輸咗6百萬。後來佢再拎錢坐虛擬幣，今次好彩，4百萬搏到變2千7百萬。但係有錢自然要fing，Carl導贏咗錢就走去買跑車買名牌靚嘢，仲搞埋離婚。

唯獨是套片，一滴進展都冇。而Carl導又夠膽問Netflix再拎多1千1百萬，否則個project就玩完。N記當然畀。

醜婦終需見家翁，Carl導都係要開工拍Conquest，但據報導指，佢去到外地拍片，被當地演員工會投訴不當對待工作人員，又指Carl導脾氣暴躁云云。事到如今，Carl導根本無法交片，Netflix回應時話已經將Conquest呢個project下架，而雙方正以法律途徑解決。

未講完架，冇貨交嘅Carl導反指Netflix爭佢1400萬！另外法庭文件入面提到，Carl導自稱啲靚車係道具。單案預計就快有判決，食住花生等。

成件事曲折離奇到咁，不如Netflix將個故事拍返做一套劇，起碼蝕少啲。不過記得唔好搵Carl導拍……

更多電影文章

電影LOL 今期睇咩戲︳拿破崙／困獸／自由之聲／魔髮精靈：夾BAND天團／詩／臍帶

電影LOL︳《奪命狂呼7》女星撐巴勒斯坦被炒 女主角Jenna Ortega翌日辭演

電影LOL︳少年習武橋段冇得輸《龍威小子》推出40年後再拍續集 物色功夫小子做成龍徒弟

電影LOL︳網民用A.I惡搞二創Pixar畫風海報 玩有味meme圖教壞細路？

電影LOL︳總理都撐！泰國驚嚇笑片《送葬人》上映未夠一個月狂收7億泰銖

電影LOL︳傳奇天后Edith Piaf自傳 用A.I重現本尊聲音做旁白

電影LOL︳Marvel搵《復仇者聯盟》舊人救亡風聲四起 「黑寡婦」Scarlett Johansson咁回應

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！