電影LOL︳少年習武橋段冇得輸《龍威小子》推出40年後再拍續集 物色功夫小子做成龍徒弟

Sony將製作80年代荷里活打片經典《龍威小子》續集電影！首集《龍威小子》於1984年上映，由Ralph Macchio及Pat Morita主演，故事講述少年Daniel受盡欺凌，向空手道大師Miyagi拜師學藝，苦練下成為空手道好手，保護自己之餘仲成功翻身脫離弱者行列。

系列當年大受歡迎，分別於1986年及1989年推出續集及《龍威小子3》，之後可能因為主角Ralph Macchio長大成人先無再繼續拍。1994年換湯唔換藥，改由未係影后仲係少女嘅Hilary Swank，繼續向師傅Pat Morita學藝嘅The New Karate Kid。

有好戲橋又點捨得唔拍？所以Sony喺2010年再翻拍過，改由成龍同Will Smith仔仔Jaden Smith主演，空手道大師Miyagi變功夫武術大師韓先生，而少年唔叫Daniel變成小孩Dre Parker，無空手道不過片名繼續叫The Karate Kid，反而香港片名《功夫夢》改得貼切啲。《功》成績超出預期地好，4000萬成本拍攝票房大收3.5億，不過唔知點解電影續集無下文！

2018年推出嘅劇集Cobra Kai，講述「首代龍威小子」Daniel（由Ralph Macchio飾演）30年後成為有車有樓嘅中年男子，再次上賽場面對死對頭Johnny，以為炒冷飯，結果掀起熱潮！劇集至今播咗4季，袋咗7個電視界盛事艾美獎提名，叫好叫座！

據外媒The Hollywood Reporter報道，Sony有見「龍威小子」呢類少年習武故事咁成功，有意將系列打造成全新電影宇宙。「首代龍威小子」Ralph Macchio及「韓先生」成龍終於相遇，延續及開啟「龍威」故事新一頁。電影將由劇集I’m not okay with this及The End of the F***ing World導演Jonathan Entwistle執導；《比得兔》編劇Rob Lieber負責劇本創作。

成龍大哥近年本土票房失利，但放眼國際市場仍然有吸引力。依家電影正全球物色緊適合嘅後生仔做Ralph Macchio及成龍戲中嘅徒弟，有興趣嘅朋友記得去官網報名參加。有成龍大哥咁大盞明燈照住，包你前途一片光明。

更多電影文章

電影LOL 今期睇咩戲︳年少日記／飢餓遊戲前傳：鳴鳥與靈蛇之歌／血腥假期

電影LOL︳網民用A.I惡搞二創Pixar畫風海報 玩有味meme圖教壞細路？

電影LOL︳總理都撐！泰國驚嚇笑片《送葬人》上映未夠一個月狂收7億泰銖

電影LOL︳傳奇天后Edith Piaf自傳 用A.I重現本尊聲音做旁白

電影LOL︳Marvel搵《復仇者聯盟》舊人救亡風聲四起 「黑寡婦」Scarlett Johansson咁回應

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！