電影LOL︳Marvel搵《復仇者聯盟》舊人救亡風聲四起 「黑寡婦」Scarlett Johansson咁回應

自從《復仇者聯盟4：終局之戰》創下驕人成績之後，Marvel超級英雄片從口碑到票房都開始走下坡。最新之作《Marvel隊長2》更創下漫威宇宙(MCU)最低開畫票房紀錄，北美地區僅收4700萬，仲少過15年前嘅《變形俠醫》未計通漲前嘅開畫票房數字，死未？

演員公會罷工令宣傳受影響，當然係死因之一，但近年Marvel將個宇宙發到宇宙咁大，睇戲之餘仲要追埋劇，die hard fans以外邊有咁多時間同你睇晒？而且，《復仇者聯盟4》入面，戲中主角Iron Man同黑寡婦都已經壯烈犧牲，戲外佢地亦另有發展，一堆新作冇晒啲熟悉面孔，梗係爭少少。

（以下有少量Loki Season 2劇透）

早排MCU新劇Loki第二季開播，主角Tom Hiddleston上Jimmy Fallon深夜show接受訪問時，被問到劇中Loki擁有操控時空嘅能力，會唔會搵返Iron Man等人？Tom Hiddleston知道條問題擺明要chok佢MCU會唔會計劃令角色翻生，當堂好小心，只係話Loki的確可以回到過去搵Iron Man同黑寡婦，而Loki本身都死過幾次云云。

自此之後，「MCU想搵Iron Man同黑寡婦歸隊救亡」嘅傳聞傳到似層層。今日輪到當事人「黑寡婦」Scarlett Johansson開口。Scarlett Johansson為自家護膚品牌同新片Tower of Terror上去晨早節目受訪，主持人Al Roker直接問Scarlett「你有冇機會會返去MCU呢？」，佢就詐傻扮懵咁答「即係有漏洞咁，可以返來？可唔可以變做殭屍或者喪屍咁返嚟？」，擺明遊花園。

Al Roker當然唔收貨，再問Scarlett有冇人搵佢傾過呢件事﹐Scarlett笑住落閘之餘仲話「我好想講你知，但係唔講得」，轉頭仲話要轉話題。而喺同一個節目，Scarlett就話如果黑寡婦起死回生的話，對Marvel而言係奇蹟。嗱，一滴風聲都冇漏架，阿姐果然係阿姐，呢啲表現好睇過近年啲超級英雄片……

更多電影文章

電影LOL 今期睇咩戲 ︳Marvel 隊長2／錄陰帶／永恆的記憶／東京復仇者2 血腥萬聖節篇-決戰／燃冬

電影LOL︳7500萬美元幾乎倒落海 華納本賜死《小鳥嗶嗶》真人動畫電影 一個原因救返

電影LOL︳Y2K青春片Mean Girls翻拍音樂劇版 當年女主角變晒中女拍超市廣告

電影LOL︳聲勢不及Netflix Disney+ Apple TV＋買起Snoopy搶收視

電影LOL︳12月飛東京動漫節睇星！同新田真劍佑Benedict Cumberbatch合照唔駛2千蚊

電影LOL︳80年代經典笑匠 丹尼迪維圖有意拍《掟阿媽出火車》續集

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！