電影LOL︳總理都撐！泰國驚嚇笑片《送葬人》上映未夠一個月狂收7億泰銖

泰國片三個字，聽到都驚。唔係話質素曳，而係泰國電影最馳名嘅鬼片，堅係得人驚。呢期有套新泰片，票房好到得人驚。

由新一代導演Thiti Srinual執導嘅The Undertaker（台譯《送葬人》），上映未夠一個月就收到7億泰銖票房，衝上泰國史上最賣座電影亞軍寶座，係史上亞軍！就連泰國總理社他都拉埋內閣官員撐場，兼出post大讚。

《送葬人》嘅故事發生喺泰國東北地區，主角係2個新入行嘅送葬人 － 一個本來係法學院畢業生，返老家準備司法考試，但係做殯葬業嘅阿爸病咗，阿仔再怕鬼都要撐住家業；另一個年青人做送葬人，因為想同前女友鬼魂重逢。2個新仔做一個神秘行業，估都估到有好多甩轆事發生，例如唔覺意劈斷咗逝者隻手……好在佢地有帶膠布咋！從預告所見，導演處理手法幾似泰國近年好精彩嘅廣告風格，用畫面、停頓位等營造笑位同驚嚇位。

《送葬人》票房大爆發，應該同口碑有關，因為開畫後第2周嘅票房竟然好過首周，仲要係升咗2倍有多。套戲除咗有驚有笑，仲會有浪漫催淚位，簡直要你一次體驗晒幾種情緒狀態。台灣片商已經安排套戲12月22日上映，相信香港都有機會睇到。

更多電影文章

電影LOL 今期睇咩戲︳年少日記／飢餓遊戲前傳：鳴鳥與靈蛇之歌／血腥假期

電影LOL︳傳奇天后Edith Piaf自傳 用A.I重現本尊聲音做旁白

電影LOL︳Marvel搵《復仇者聯盟》舊人救亡風聲四起 「黑寡婦」Scarlett Johansson咁回應

電影LOL︳7500萬美元幾乎倒落海 華納本賜死《小鳥嗶嗶》真人動畫電影 一個原因救返

電影LOL︳Y2K青春片Mean Girls翻拍音樂劇版 當年女主角變晒中女拍超市廣告

電影LOL︳聲勢不及Netflix Disney+ Apple TV＋買起Snoopy搶收視

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！