雅虎香港新聞 電影LOL︳搶人才！DC主腦爆料︰會帶《銀河守護隊3》演員去拍新《超人》
美國編劇工會就薪酬待遇不公展開罷工。荷里活錢多不過超大細超，出名如《權力遊戲》嘅編劇David Benioff及Dan Weiss等可以叫價幾千萬美金寫劇本，唔出名就算攞過獎嘅都只能收超低價。榮獲編劇工會最佳喜劇《大熊餐廳》（The Bear）嘅編劇Alex O’Keefe直認佢拍劇期間，片商連飛佢到片場嘅機票錢都唔肯出，佢只能遙距改劇本，依家罷工佢直頭要去戲院打工幫補。
今次罷工直接影響未來數年嘅影視製作，好似全球大熱嘅《怪奇物語》就因此要延後推出日期，James Gunn主理嘅《超人》（Superman The Legacy）因為罷工前已經搞掂咗初稿，成為少數唔受工潮影響嘅電影。
現階段《超人》正在物色演員陣容，James Gunn近日同「星爵」Chris Pratt出席Comic con 宣傳《銀河守護隊3》時講笑，認為可以由Chris Pratt飾演「超人」嘅「超級狗」氪圖（Krypto the Superdog）。
雖然似開玩笑，不過粉絲一樣聽得好開心！因為《銀3》嘅浣熊火箭超搶鏡，電腦特效又超逼真，「超級狗」落喺James Gunn手一定好好玩！
愛將還愛將，但係幾肯定Chris Pratt一定唔會取代Henry Cavill成為新「超人」！據報新版「超人」將會非常年輕，故事講述佢從人類Clark Kent同氪星人後裔兩種身份中尋找平衡，受人類慈愛嘅影響，決心以真誠、正義守護地球。雖然新「超人」未定繼任人選，不過導演明示會帶部份漫威《銀河守護隊3》嘅演員去DC嘅「超人」系列！成事的話，演員喺漫威、DC兩邊走睇到眼花撩亂！《超人》電影預定2025年上映。
更多電影文章
電影LOL︳徐克版《射雕英雄傳》落實開拍 肖戰演郭靖 新人莊達菲演黄蓉被嫌唔夠俏？
電影LOL︳X-Men靈魂人物 神級韓裔漫畫家Jim Lee出任DC漫畫主席
電影LOL︳超多星助陣 蝙蝠俠Robert Pattinson新片演極變態殺人狂 搵說客推動修例務求再落手
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
