雅虎香港新聞 電影LOL︳爆笑性喜劇《美國處男》重啟 搵女導演拍咸濕仔？
又係舊片重拍嘅消息嘞，今次係邊套呢？
係荷里活史上其中一套成功刀仔鋸大樹嘅喜劇《美國處男》(American Pie)。呢套1999年作品，成本只係1100萬美元，結果全球票房勁收2億3500萬，加埋租碟市場賺嘅1億1千萬，即係勁賺三十幾倍！咁爆，拍續集同第3集是常識吧，甚至隔咗13年再拍埋第4集，都仲有2億幾票房。為咗搾乾搾淨，電影公司直情用American Pie Presents牌頭，拍一系列青春性喜劇，只係出DVD唔上戲院，前年都仲有第5套”American Pie Presents”出品，舔到盡。
《美國處男》簡單講就係一班對性好奇嘅高中男生（簡稱咸濕仔啦），好想一如美國學界嘅傳統，喺畢業舞會過後交出人生第一次……你懂的。而最煞食嘅係片中同學仔形容女仔個＿就好似蘋果批咁，於是男主角Jim真係用蘋果批嚟……。淨係呢個小綽頭，已經夠晒畫面同笑點，難怪咁受歡迎。
鏡頭一轉，今日有外媒報導，片商環球搵美籍南亞裔女導演Sujata Day負責《美國處男》重啟Project。Sujata Day本身演員出身，參演過刻劃黑人女性生活處境嘅HBO劇Insecure，而佢自己首套自導自演作品Definition Please亦係圍繞印度裔家庭發生嘅故事。
搵Sujata拍《美國處男》新版，原因好明顯︰呢幾年西方平權意識高漲，廿幾年前嘅《美國處男》實在有好多場口，而家拎出嚟睇就覺得有問題 － 首先，主要角色都係白人；另外，戲中男主角Jim約東歐女同學Nadia返屋企，竟然開webcam偷拍對方，結果唔覺意成為直播，全校睇晒Nadia除衫，結果俾人踢出校兼送返老家，但係令到Nadia俾人睇晒嗰班仔一啲事都冇。
再以呢種尺度處理呢個「咸濕仔」故事，隨時俾人話「物化女性」，男導演基本上唔駛亦唔敢接。由南亞裔兼女導演處理，加上據報導所講新版故事係Sujata構思，同之前嘅好唔同，原版幾個白人男仔追女仔嘅設定都應該見唔到嘞。而家仲未知條大橋係點，但係性喜劇要好笑，唔多唔少要政治不正確，加上廿幾年過後風氣唔同晒，仲將「性」當係賣點？大家咁多年有咩未睇過呢？觀眾仲buy唔buy架？
更多電影文章
電影LOL︳魅笑／龍珠超劇場版：超級英雄／好狗不見了Haw／一台殺戲／MOONAGE DAYDREAM
電影LOL︳國產TOP GUN 王一博主演《長空之王》上畫3日前突然被撤
電影LOL︳尋回香港曾經的美好 張艾嘉21年後再演港產片《燈火闌珊》
電影LOL︳Netflix節目巡禮TUDUM披露 《天才少女福爾摩斯2》 Emily in Paris映期
電影LOL︳古天樂宣佈香港班底製作《明日戰記》前傳動畫 2025年有得睇？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
