雅虎香港新聞 【電影LOL】Monster Hunter電影版 因為MC Jin 一句對白被指「辱華」要立即落畫
改編自CAPCOM大熱遊戲嘅電影《魔物獵人》(Monster Hunter) 出師不利，喺內地上映1日就因為「辱華」風波而被即時叫停，賣哂飛都要退返錢俾觀眾！《魔》由騰訊投資，故事改編大熱遊戲，由《生化危機》系列女星Milla Jovovich、泰國動作巨星Tony Jaa同近年積極開展內地市場嘅MC Jin主演，特技加上打怪物嘅劇情，喺內地票房差極有限，開畫日場次及人數亦相當理想，直至爆出劇情「辱華」！
事緣電影中MC Jin同另一位美國人於沙漠開車尋找失散隊友，MC Jin叫「Look at my knees」（睇下我膝頭）另一人回「What kind of knees are these?」（你個咩膝頭呀？），MC Jin就回一句「Chinese」（中國人）。呢段食Knees同－nese諧音嘅爛gag，坦白講唔好笑，不過因為由MC Jin講，對白可以當成帶點自嘲嘅閑聊。中譯字幕亦巧妙地將呢段意譯為「男兒膝下有黃金」。
不過一向敏感又異常仔細嘅內地朋友唔係咁睇，新浪遊戲喺微博發文加上疑似盜錄片段，話呢段對白出於一首二戰後流行、歧視中、日嘅童謠「Chinese Japanese, dirty knees, and look at these」，《魔》中出現咁嘅對白係有心侮辱中國人！就係咁事件迅速發酵，網民大罵《魔》囂張、廣電局審片不力、字幕亂譯以為觀眾唔識英文，明目張膽歧視中國人咁話！
愛國網軍當然大舉衝去MC Jin微博鬧佢係咪唔想再賺人民幣，再湧去Monster Hunter遊戲專頁留負評，話個game歧視中國人，搞到CAPCOM要發聲明同電影公司劃清界線，指電影內容同佢地無關。而電影公司對住現時全球唯一票倉，當然唔解釋即時道歉，仲即刻剪走出事片段。可惜救唔切嘞，套戲已經被消失，根據內地「時光網」報導，《魔》片「場次全部撤掉，退票處理，嚴禁再放映，新拷貝的全國發運工作暫停。」
《魔》就算剪完再上票房肯定大受影響，相信Constantin Film同騰訊都無諗到搞掂CAPCOM同廣電局，竟然得罪內地觀眾搞到血本無歸！可能連廣電局都唔想認自己走漏眼，所以暗地出手清洗所有《魔》網上負評，成套戲被消失！
內地觀眾啲錢都幾難賺，迪士尼《花木蘭》搵哂內地人氣演員劉亦菲、鞏俐、李連杰主演，睇住中國市場拍，結果劉亦菲嘅造型、土樓取景拍攝等又被指責對中國歷史無認識，係「辱華」！Marvel宣布拍由亞裔演員班底主演《上氣》，造型照都未見到就被冠以「辱華」，因為梁朝偉飾演嘅「滿大人」以傅滿州為原型，而且有份主演嘅Awkwafina外表遭受內地網民劣評，怒插唔係內地網紅樣，cast佢都係「辱華」！
由韓國綜藝節目背景枝旗、女團成員上載喺社交媒體嘅相，到天團接受獎項嘅發言甚至衣著打扮等，都被內地網友指責有辱華成份。有時政治正確定過份敏感真係好難分，不過結果肯定係觀眾無戲睇囉！
更多電影文章
【電影LOL】男神Benedict搭影后Jodie Foster The Mauritanian踢爆美軍不人道一面
【電影LOL】Ellen Page宣佈成為跨性別人士改名Elliot 細數歷年好戲力作
