雅虎香港新聞 【電影LOL】華納宣布明年新片 戲院、網上同步放映
鑑於新冠疫情嚴重，北美多個地區戲院重開無期，各大電影公司不斷出招自救，包括大力發展自家串流平台！華納早前宣布《神奇女俠2：1984》於戲院、HBOmax同步上映，當業界以為只係針對《神》嘅特殊安排，點知《神》都未開畫，戲院、串流平台同步成效未知嘅情況下，華納再作出驚人舉動：宣布2021年所有新片將會戲院、HBOmax串流平台同步上映！
華納下年片單強勁，包括有sci－fi鉅製，由Denis Villeneuve執導、「甜茶」Timothee Chalamet、《蜘蛛俠》系列女星Zendaya、《水行俠》Jason Momoa及張震等主演嘅《沙丘瀚戰》(Dune)； 改由《銀河守護隊》導演James Gunn執導、加入史泰龍、Idris Elba嘅《自殺特工：超能暴隊》及奇洛李維斯經典作品延續《22廿紀殺人網絡4》等，套套都係票房穩收嘅鉅片！
今年新冠疫情打亂多年固有電影運作模式，以往電影先於戲院作第一輪放映，上映或落畫後一段時間先可以喺電視台、串流平台等戲院以外平台播映。華納突然宣布戲院、串流平台同步上映嘅舉動，引來美國戲院業界不滿，搞到戲院股即時插水，AMC院線發言人指責華納嘅做法只會令戲院雪上加霜！
眼見疫情期間Netflix、Disney+等串流平台生意錄得超高增長，其他片廠因為電影不斷延期上映而蝕錢，戲院、串流平台同步只係電影公司求存變通嘅方法。
開台最早嘅HBO有好多猛片及劇集，不過一向對擴展串流平台業務懶懶閒，HBOmax暫時只得美國地區，訂閱人數只有860萬，比起全球多個地方都有得睇嘅Disney＋（訂閱人數7370萬）及Netflix (訂閱人數1億9520萬）差天共地。適逢新冠疫情，睇嚟佢地終於決定急起直追，將HBOmax發展成全球業務似係勢在必行！
今次華納嘅舉動雖然唔影響國際發行，美國以外地區戲院上映計劃不變，不過間接影響日後電影內容製作；一來其他片廠有機會仿效，將作品直上平流平台，變相戲院以後側重放映Event Movie類型商業鉅製，中、小型片頂多為符合參加奧斯卡（如果賽制不變的話）於戲院作有限放映，其餘直上串流平台。
二來片廠將來製作針對戲院放映嘅電影時，必定考慮市場因素。未有新冠疫情，美國片廠已經不時為咗票房，迎合中國呢個全球第二大票倉。依家美國戲院瀕死，中國有機成為全球最大票房地區，以後就算係荷里活出品會唔會可能都有陣國產味？
更多電影文章
【電影LOL】男神Benedict搭影后Jodie Foster The Mauritanian踢爆美軍不人道一面
【電影LOL】Ellen Page宣佈成為跨性別人士改名Elliot 細數歷年好戲力作
【電影LOL】迪士尼又翻炒拍新版《寶貝智多星》原版導演狠插︰浪費時間
