【電影LOL】迪士尼又翻炒拍新版《寶貝智多星》原版導演狠插︰浪費時間

·2 分鐘文章

每年聖誕必睇嘅經典電影《寶貝智多星》(Home Alone)不經不覺已經倍伴咗我哋30年,男主角麥哥利高堅都由天才童星變成40歲中佬。不過《寶貝智多星》嘅地位至今仍穩如泰山,難得套戲咁多年都依然話題性十足,早兩年連GOOGLE智能家居系統廣告,都要搵麥哥利高堅出山重演一次《寶》經典場面,結果條片大受歡迎!

又或者導演Chris Columbus都無諗過,作品上映多年後會因為美國總統特朗普有份客串,而被人問起1992年嘅《寶貝智多星2》幕後花絮!話說當年因為借特朗普旗下酒店拍攝,其中條件必需加入特朗普戲份,導演被逼答應所以先出現咗《寶2》「侵侵」為麥哥利高堅指路一幕。短短7秒戲份,明明「路人甲」到爆,原本打算拍完唔用,結果試片時觀眾見到特朗普出場即刻起哄,導演先決定保留佢嘅戲份!

其後因為麥哥利高堅息影所以第3集拍唔成,不過導演Chris就覺得無所謂,但係對於故事重拍佢就好有意見。Chris Columbus覺得第2集《玩轉紐約》將上集同一條橋玩多次,已經算係重拍,加上麥哥利高堅嘅演出深入民心,再拍一次亦難以超越,結果後來換咗男主角及導演嘅《寶貝智多星》3、4、5集一敗塗地,直接成為電視電影!

3-5集嘅失敗,仍然無阻迪士尼重拍《寶貝智多星》嘅決定,仲搵咗《陽光兔仔兵》入面男主角嘅肥仔好友Archie Yates、《死侍2》飾演X-Force中唯一無超能力、剩係會寫twitterr嘅大叔Rob Delaney,以及美劇Unbreakable Kimmy Schmidt女主角Ellie Kemper主演。迪士尼CEO就話重拍版會注入新元素,仲會發揮想像力添!

不過導演Chris Columbus就好唔贊成重拍,明言迪士尼浪費時間,仲話與其有時間度新嘢包裝一套經典,不如度過套新片,就算成績一般至少係原創故事!可惜迪士尼唔係咁諗,近年佢咃緊守嘅必勝方針就係將自己旗下所有經典重拍一次,包括將2D動畫版照抄一次翻拍3D真人版,故事分鏡都慳埋,又套套大收喎!

新版《寶貝智多星》已經完成拍攝做緊後期,傳聞迪士尼重金禮聘麥哥利高堅客串演出。如果消息屬實,條橋再舊都有一定吸引力!新版暫時未有上映時間表,到底麥哥利高堅會唔會重現《寶貝智多星》就要再等下先知!

更多電影文章

【電影LOL】今個星期睇咩戲 《熱血合唱團》《阿索的故事》《特務打爆機》《攣愛季節》《EMMA:上流貴族》《美好年華》

【電影LOL】下一個兒童界巨星 會係呢隻Clifford The Big Red Dog?

【電影LOL】《大白鯊》25呎道具鯊魚復修完成 放入電影博物館

【電影LOL】范冰冰聯同國際級女星壓陣 The 355押後一年上映

【電影LOL】香港電影金馬獎得獎 《夜更》《迷航》2種抗爭角度

【電影LOL】《神奇女俠2:1984》鐵定聖誕檔 銀幕串流平台同步上映