靈戲逼人｜靈異題材輕鬆又搞笑 龔嘉欣可愛演出有望衝視后？

TVB新劇《靈戲逼人》由龔嘉欣及張振朗領銜主演，劇情主要講述流行曲音樂人丁一駿（張振朗飾）及女鬼雲柳芳（龔嘉欣飾）譜出一段淒美動人嘅人鬼戀。劇集喺星期一（3日）首播，等我哋一齊睇下網民有咩反應啦！

劇情輕鬆搞笑
《靈戲逼人》已經播出幾集，劇情講到搬入西貢小村嘅丁一駿，打開戲班衣箱釋放咗被困嘅花旦女鬼雲柳芳，之後仲開始幫佢搵開戲師爺曲行雲嘅下落。喺噚晚嗰集，雲柳芳為咗搵曲行雲下落，竟然跟隨丁一駿女友（蔚雨芯飾）搭中港巴士，丁一駿發現後即刻去搵佢，不過發現佢嘅時候已經氣若游絲，好彩丁一駿搵熟知靈異事物嘅傑仔（吳子冲飾）探問，成功救返雲柳芳。劇集都有唔少搞笑情節，例如丁一駿知道雲柳芳係鬼，佢嘗試利用十字架、蒜頭及聖經嘅圖片去企圖驅鬼，不過可惜通通無效，雲柳芳仲擺出得戚挑機樣。唔少網民睇咗幾集後都大讚劇集題材輕鬆及好睇過《隱門》，留言「呢d題材應該幾好睇 輕輕鬆鬆」、「呢啲題材得意啲，一定好睇啲」、「隱門咁黑暗，靈戲逼人笑吓中和番」、「輕鬆的鬼片！不錯！」、「好過睇早排啲打打殺殺變態劇」、「其實今次劇集幾得意 係我中意睇嘅題材」、「好好笑 放工睇下呢類劇，真係可以鬆一鬆」及「靈戲逼人 正過 隱門 多多聲 ! 隱門 只係低配版嘅 迷 !」等等。

好似《魂魄唔齊》？
《靈戲逼人》以粵劇作為劇集背景，再加上飾演流行曲音樂人嘅張振朗及飾演女鬼嘅龔嘉欣，譜出一段淒美動人嘅人鬼戀，所以唔少網民都覺得劇集好似由陳奕迅及容祖兒主演嘅電影《魂魄唔齊》，紛紛留言話「感覺有啲似魂魄唔齊」、「套野抄eason魂魄唔齊？」、「似魂魄唔齊」、「抄魂魄唔齊？」及「感覺有啲似魂魄唔齊囉」等等；另外仲有網民指劇集有啲似《水髮胭脂》及《大鬧廣昌隆》。

龔嘉欣有望衝視后？
龔嘉欣喺《靈戲逼人》飾演被困戲班衣箱近30年嘅女鬼雲柳芳，被丁一駿釋放後，希望可以搵到曲行雲嘅下落。佢飾演嘅女鬼可以話非常貼地，除咗識執屋之外，佢仲識得煮飯。貪靚嘅雲柳芳喺第一集以大戲服造型登場，不過之後佢就換上充滿青春感嘅現代服飾，成功俾觀眾不一樣嘅感覺。唔少網民睇咗龔嘉欣嘅演出後，紛紛留言大讚佢喺劇中好可愛又望衝視后，例如「龔嘉欣力衝視后之作」、「邊到有咁可愛既鬼」、「真心係幾好睇 龔嘉欣視后可期絕對不是講笑」、「龔嘉欣係好戲之人！期待故事發展」、「有興趣追既劇！龔嘉欣演得不錯」、「龔嘉欣可能拎視后」、「現代版《大鬧廣昌隆》，睇好龔嘉欣爭視后」、「龔嘉欣做呢啲角色好正」及「而家龔嘉欣演得幾風趣幽默，幾好睇」等等。

又係你呀阮浩棕
《靈戲逼人》係阮浩棕今年第三套出街嘅劇集，之前仲有《隱門》Ethan及《隱形戰隊》鏗少，今次佢喺《靈戲逼人》中飾演熱血追尋粵劇夢嘅「文武生」方浩東，與劉穎鏇飾演嘅葉敏敏係情侶關係，戲份一啲都唔少。唔少網民有留意到佢，並大讚佢靚仔、可塑性高及有望奪「飛躍進步男藝員」，例如「今年第三套有鏗少」、「又有細佬」、「好型鏗少」、「佢做得幾好，院浩棕加油」、「阮浩棕。有型。又靚仔 有進步。 做得好好 繼續努力 加油 加油」、「阮浩棕都有好多演出機會，要好好把握了」、「明年飛男一定有你份」、「阮浩棕演技好又自然.不做作，今年有機會攞獎!」及「細佬好Chur⋯⋯男飛躍預定」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！