靠陳倩揚低醣飲食法 商台DJ朱薰半年減24磅 入嚟睇餐單！

娛樂圈不成文定律︰上鏡肥10磅！於是幕前人都會盡力保持身型，而間中都要出鏡同埋做活動司儀嘅商台DJ朱薰，最近都搵到方法修身，仲要一減就24磅！

已經係兩子之母嘅朱薰今日出post，分享佢嘅減磅心得。朱薰半年前因為見到朋友由飲食入手減咗30磅，於是減埋一份。佢根據前港姐陳倩揚嘅「低醣飲食法」，少食澱粉質同糖，主要進食蔬果、蛋白質等食物，再加大量飲水，就咁搞掂。（餐單見下文）

朱薰大讚餐單「夠人性化，唔係要捱餓」，而且每周有一日食乜都得，自問唔算辛苦。佢好感謝倩揚嘅餐單，同埋工人姐姐安排食乜，又勉勵想跟住減磅嘅朋友「唔係話只係不斷追求個瘦字，而係要追求個人開心！我想大家都可以得到呢個開心」。

睇返朱薰個IG，過年嗰排的確有少少圓潤，到近期真係變返面尖尖潮媽一個，仲著得返以前啲褲，好犀利！

低醣飲食餐單（朱薰版本）

－食物分四類－綠色蔬菜、非綠色蔬菜（菇、三色椒、蕃茄等）、蛋白質（所有肉類）及原形澱粉質（蕃薯、南瓜等）

－需計算所需份量

－每日飲體重（以公斤計）x 40毫升嘅水

－8個星期一個循環，每周有一日Open Day可隨意進食，完成一個循環後有2星期open week，都係可以隨意進食，不過係放鬆而唔係放縱。

－頭2星期要暫停食飯、意粉、麵包等碳水化合物

－盡量8－10小時內食完三餐，晚餐7時前完成

早餐

蛋 1-2份

水果 兩個拳頭份量

奶或無糖豆漿（可以加奇亞籽）

午餐（按照8星期裏面嘅第幾星期）

Week 1／2／5／6：50%綠色蔬菜、10%非綠色蔬菜、40%肉

Week 3／4／7／8：綠色蔬菜、非綠色蔬菜、肉及原型澱粉質各25%

晚餐

蔬菜（按︰陳倩揚建議唔夠飽可以飲米奶）

因為呢個方法而成為減磅達人嘅陳倩揚有3個仔女，前年7月生完細女之後試過最重去到138磅，後來靠低醣飲食，2個月內減走28磅！想知道詳細操作方法同埋點煮好味又健康嘅菜式，可以加入倩揚嘅你得我得行動組 facebook群組。當然最好請教下專業人士意見先啦～

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！