【風光背後】曾欠過千萬巨債 鄭則仕變賣家當狂接劇還債

無綫新劇《荷里活有個大老千》現正熱播，劇集有鄭則仕（Kent哥）做男主角，劇情開頭講述佢因為賭博及出千搞到坐監兼家破人亡。Kent哥嘅演技當然係冇得彈，唔少觀眾大讚佢演技大爆發，完美演繹唔同層次嘅「痛」。

Kent哥喺娛樂圈打滾多年，得到唔少圈中人嘅尊重。佢喺1973年加入電影公司培訓班而入行，1976年加入無綫，遇上唔少好劇本，例如《四眼神探》、《楊門女將》及《獵鷹》等等，之後佢開始轉戰電影圈，更憑電影《何必有我？》及《三個受傷的警察》兩度成為金像影帝。不過最令大家留下印象深刻一定係亞視劇集《肥貓正傳》中飾演肥貓一角。

大家以為佢嘅事業好一帆風順？其實Kent哥喺1993年因為自家經營嘅電影公司欠債1700萬，令佢身懷巨債。面對咁大嘅數目，唔少人都叫佢結業了事，但佢選擇努力還債，最後搞到自己一鋪清袋。佢仲講笑咁講除咗老婆、仔女同父母之外，佢將自住嘅樓、車、所有賣得嘅資產都賣晒。

當時為咗儘快清還債務，Kent哥一家由九龍塘豪宅，搬去只有得幾百呎嘅單位生活。當賣晒所有野都唔夠錢嘅時候，佢仲要厚住面皮咁去問人借錢，仲要狂接新劇集，去為自己還錢之路負全責。

大大話話還錢還足四年，由1993年還到1997年，終於都還清。就係因為佢知道自己身為一位公眾人物，要抬得起頭做人，所以就算佢喺公司只係其中一名股東，佢都將筆債自己攬哂上身。

而早前播出嘅無綫劇集《大帥哥》男主角張衛健（Dicky）都屬於Kent哥公司旗下藝人，因為當時Kent哥被片商走數唔俾錢，令到公司周轉不靈，搞到Dicky成為債主之一。當時嘅Kent哥同Dicky一度因為呢年事而反面。後來張衛健搵唔到工作，全靠鄭則仕好朋友劉德華借錢俾佢，並推薦佢拍戲。劉德華唔單止幫Dicky，仲幫好朋友Kent哥渡過難關。除咗劉德華之外，蕭若元同周潤發都同樣借錢及製造更多工作機會俾Kent哥，就係鄭則仕嘅為人正直，令到好多朋友都會二話不說，幫到就盡量幫！

Kent哥更多謝一直留喺自己身邊嘅太太（前無綫藝員林燕明）對佢不離不棄，知慳識儉。近年因為環境好轉，太太仲幫佢投資嘅四個物業變賣，大賺過千萬港元。而27歲嘅大女同25歲嘅細仔，幸好對娛樂圈完全無興趣，甘於過平凡踏實嘅生活，現時嘅生活狀況，可以話係鄭則仕最嚮往的。