飛常日誌｜馬國明老是常出現 劇情太hard sell變咗廣告雜誌？

TVB新劇《飛常日誌》由馬國明、蔡思貝、高海寧、洪永城、朱敏瀚、劉穎鏇、郭柏妍、吳偉豪、徐榮、戴祖儀及陳豪主演，劇集以航空業為題材，故事主要圍繞機場每日接連發生嘅事件。 劇集喺噚晚（15日）已經首播，而家就同大家睇下網民嘅反應啦！

係咪睇緊廣告雜誌？
噚晚劇情主要講述有颱風襲港，一度影響航班升降，機場中央控制中心值班經理楊尚偉（馬國明飾）展開航班重新編配等工作，而港灣航空駐機場主管張若玲（蔡思貝飾）負責安撫受影響嘅旅客；港灣航空空服員張穎（戴祖儀飾）發現航班上有孕婦提前作動，需要急降落香港國際機場；同一時間機場客運服務經理呂芷珊（高海寧飾）發現有小朋友無人看管，需要協助佢尋找家人。劇集播出後，唔少網民都給予負評，認為劇情太hard sell，好似宣傳片／廣告雜誌，留言話「低質廣告雜誌」、「好hard sell無劇情」、「得10集，似係機場宣傳片多D,不如改番名叫“香港機場2024”」「成條宣傳片咁，悶到阿媽都唔認得」、「以為睇緊宣傳片」及「睇highlight 已經覺得演得好造作，似宣傳片多啲」等等。

最後一幕好老土
喺噚晚劇集尾段，眾人完成工作後，一齊微笑望住天空。唔少網民都認為呢一幕好老土同好似大結局，留言話：「最後個SHOT好X老土」、「好x老土 一齊微笑望天空 唔講以為大結局」、「拍得好老套」、「大結局？咁齊人」、「全劇終？」及「第一集最後播到成個大結局咁」

馬國明老是常出現
喺前日《萬千星輝頒獎典禮2023》憑《新聞女王》梁景仁一角獲「馬來西亞最喜愛TVB男主角」嘅馬國明，喺上年已經參與四套劇集演出，包括《隱形戰隊》、《法言人》、《破毒強人》（客串演出）及《新聞女王》。嚟到今年只係過咗半個月，就已經喺《你不是她》（客串演出）及今次《飛常日誌》見到佢嘅蹤影。唔少網民都認為馬明出現得太多，留言話「新聞女王外傳做啦」、「馬國明真係睇到好X厭 d戲又木獨」、「又高ling又馬明」、「點解每套劇都有馬明?想轉台啦」及「馬明就黎睇到厭」等等。

劇中靚女眾多
《飛常日誌》雲集靚女演員，噚晚已出場嘅有蔡思貝、高海寧、郭柏妍及戴祖儀，嚟緊仲會有大家非常期待嘅空姐look劉穎鏇出場，所以一班網民都起哄地留言大讚劇集靚女多，例如「達哥好似靚左」、「達哥幾靚 仲keep到」、「蔡思貝都係長髮好睇」、「貝貝好靚」、「高ling幾靚」、「呢套主打女太屈」、「郭柏，高ling，達哥，大joey，正到」、「Joey幾正」、「突然覺得大Joey 好正」及「郭柏妍正過達哥多多聲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！