首合體拍戲 無懼撼MIRROR ERROR谷4,500萬票房 除埋阿Dee條底

「宇宙天團」ERROR昨日合體出席新片拜神，期間槍口一致攻擊成員阿Dee，誇口指若票房達4,500萬元，便聯手除阿Dee底褲。對於同門的MIRROR亦合體拍戲打對台，4子表示不同界別，無需比較！

ERROR、周家怡、譚旻萱（Mandy）與郭思等，昨日出席英皇電影《陰目偵信》開鏡拜神，此乃ERROR首度合體孭飛之作，故4子格外興奮，妙語連珠笑爆嘴！

成員肥仔、193與保錡先吹噓阿Dee即將成為「億萬票房男星」，一輪嘴不讓對方出聲，保錡說：「阿Dee 8千萬除褲，呢套戲如果4,500萬，我哋3個夾住除埋佢條底褲！（你哋3個除咩呢？）我哋每人100萬，梗係唔使除啦！」193笑指今次阿Dee貴為主角，他們只是茄喱啡；肥仔則以「電影初哥」自居，指阿Dee在影圈打滾多年，3子任配角都正常。

周家怡笑肥仔口花

面對兄弟你一言我一語，阿Dee無奈說：「佢哋係當打電影圈新人，總之4個都係男主角，不分彼此。」193打蛇隨棍上，問阿Dee若在金像獎得獎，會否再除褲慶祝？阿Dee說：「經過上次除褲找數之後，我唔會再作任何回應，但會喺不同時段除佢哋條褲，反正我再除褲都冇驚喜。」談到MIRROR亦合體拍電影，可擔心打對台？4子笑指兩個組合屬不同界別，無需比較，193更趁機邀「鏡仔」客串：「話唔定有2億票房，好過觀音借庫。」

同場的周家怡、Mandy與郭思飾演鄰居，問到可有感情線？家怡笑指與現實一樣Dry，幸肥仔不斷氹她開心：「佢成日花言巧語話好鍾意我，又話我好可愛，不過我已經習慣，因為之前拍劇集《反起跑線聯盟》，佢都成日整蠱我。」