香港人在北京｜傅嘉莉搣甩花瓶形象被網民讚好戲 「方晴」付嘉撞樣陳鍵鋒獲關注

TVB熱播劇集《香港人在北京》由陳展鵬、吳若希、洪永城和戴祖儀主演，劇集播出以嚟大受好評，除咗因帶出語言及中港文化差異，鬧出不少笑話之外，同時多個劇中角色亦引起網民關注，當中包括「Funny」傅嘉莉（Kelly）及「方晴」付嘉。

最新劇情講到阿喱（洪永城飾）發現小夢老師竟然係淼淼（陳星妤飾），佢哋喺情到濃時咀嘴，被暗戀阿喱多年嘅Funny見到，佢當場大受打擊，赤腳離家出走。Funny住咗入青年旅舍，遇上背包客方晴，不過原來佢哋喺畫家村已經見過面，唔通一齊都係緣份嘅安排？Funny跟隨方晴做義工，更因對方轉帳失誤導致銀行戶口被凍結，搞到阿喱以為方晴係嚟呃錢。之後方晴約Funny見面並向佢表白，期間被阿喱大爆佢原來係百億富二代嘅秘密。

現年38歲嘅傅嘉莉唔經唔覺入行20年，佢因經常喺劇集中飾演性感及小三角色，所以被封為TVB「御用邪花」。今次佢喺《香港人在北京》一改以往嘅花瓶形象，飾演阿喱助手，性格男仔頭嘅Funny，演技令人刮目相看，網民紛紛留言大讚佢演技有進步及激推今年勢必奪最佳女配角，例如「YES.原來鍾澍佳總監製.有睇凶宅清潔師...總有人睇到KELLY進步」、「加油啊 做得好好 支持你」、「真係做得好好你 好鍾意Funny」、「呢個角色令好多人對你改觀 加油！！」、「估唔到你做戲幾好睇，我以為你係花瓶」、「年尾撐傅嘉莉女配角」、「今次真係掂曬！撐著妳創出佳績，強熱勢爭奪本年度最佳女配角。」及「傅家莉我一定提名她最佳女配角，佢由衝上雲宵演joce 純情咖啡妹出道，到呢幾年她演不同的角色她進步得很多」等等。

現年33歲嘅內地小生付嘉，喺2013年憑參演微電影《遇見你》入行，多年嚟都參演過唔少影視作品，喺內地擁有一定知名度。今次佢喺《香港人在北京》飾演暗戀Funny嘅高富帥方晴。唔少網民都覺得佢好靚仔同好似陳鍵鋒，留言話：「比香港演員帥多!!!!」、「我們在香港全部人看到你都大叫好靚仔」、「方晴好靚仔」、「個男仔個樣好正氣」、「第一眼感覺有點像陳鍵鋒呢」及「有點像陳鍵鋒」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！