香港婚後事丨43歲姚子羚對愛情有憧憬但唔會強求 自爆曾有異地戀

TVB綜藝節目《香港婚後事》噚日（23日）播出一集，邀請到姚子羚（Elaine）作嘉賓，與主持陳自瑤（Yoyo）、賴慰玲（Winki）、黎諾懿及羅天宇大談對感情及婚姻嘅睇法。單身多年嘅姚子羚曾經遇過可結婚嘅對象，並坦言現時對愛情仍然有憧憬，但唔會強求。

現年43歲嘅姚子羚單身多年，黎諾懿問大家用一日一個時段去形容自己嘅感情狀態，而姚子羚就話：「我鍾意日落，好似好sad咁，但我好鍾意日落嘅氛圍，因為我覺得你睇住個日落慢慢跌落去，但其實你冇日落，又點會有日出呢？！」

佢仲表示現時呢一刻都對愛情有憧憬，不過唔會去強求：「你唔係要搵一個人結婚呀嘛，而係要遇到一個適合你嘅人，你先至會去想結婚，我依家唔係去求職，對我嚟講其實婚姻係一生一世嘅事。」之後賴慰玲就問佢有冇遇過可結婚嘅對象，姚子羚就表示曾經有過：「有，我而家回頭望返，嗰個人並唔係我要，可以同我行落去嗰個人，可能我最終會離婚，但係我唔會想咁樣。可能你唔開心或者迷惘嘅時候，往往呢一啲人走出嚟嘅時候，通常都係錯㗎，因為你喺最迷失嘅時候，只要有個人行埋嚟，你就會覺得佢好好，但其實佢可能唔係真係愛惜你，經歷咗呢啲事你就realize，啱就係啱，唔啱就係唔啱。」

之後，佢哋就談及姊弟戀及異地戀嘅話題，姚子羚就自爆喺讀書時試過異地戀：「我嗰時喺澳洲讀書，男朋友係馬來西亞人，後嚟讀完書我返咗嚟香港，佢就返咗馬來西亞，維持咗一段時間後最終分開咗，嗰時係讀communication，但我本身唔係好識communicate。」黎諾懿再問如果有個二十幾歲嘅事業有性又靚仔嘅小鮮肉追求佢，姚子羚坦言自己未必得，如果年齡相差5年內就可以，因為如果男方年紀太細，佢嘅思想未必好成熟，去到佢長大所需要嘅嘢已經唔同，咁大家行緊嘅步伐只會越來越遠。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！