香港戲院市道繼續疲弱 暑假檔票房比去年跌18％ 僅2套港片打入十大︳電影LOL

近年有關香港戲院票房數字嘅資料，都係得個跌字。香港票房有限公司早前公布今年7至8月期間暑假檔期戲院票房總收入數字，合共2億7753萬，比去年同期近3億4千萬元數字，跌約百分之18。留意返，去年7－8月期間香港掛過一次8號風球，更多次發出紅雨黑雨訊號，但今年票房收入反不及去年。

而今年香港上映嘅94套暑假檔首輪電影當中，80部係外語片，14套係港產片。而喺票房十大當中，同樣由外語片佔領大部份位置。排冠亞軍嘅都係迪士尼出品，動畫片《玩轉腦朋友2》成為暑假票房之冠，七至八月期間收7369萬元。亞軍係Marvel電影《死侍與狼人》，收4717萬。第3位係另一套動畫片《壞蛋獎門人4》，暑假期間錄得票房為2895萬。值得留意係十大當中，有5套係動畫電影。近年日本動畫片喺香港有唔錯成績，今個暑假上映嘅《電影多啦A夢：大雄之地球交響樂》、《蠟筆小新劇場版:我們的恐龍日記》同埋《名偵探柯南100萬美元的五稜星》都打入十大，多啦A夢同小新嘅電影更錄得過千萬票房。

早兩年成為「救市神器」嘅港產片，今個暑假就顯得失色。票房十大當中只有第7位嘅《海關戰線》（收1116萬，總收1270萬）及第10位《公開試當真》（暑假收487萬），亦即係話另外12套上映港產片暑假埋單收入唔過487萬。相比2年前《阿媽有咗第二個》、《闔家辣》、《明日戰記》等多套港產電影賣個滿堂紅，甚至黃子華兩度衝破港片票房紀錄嘅聲勢，港片喺暑假檔的確未如理想。

但係子華呢粒票房靈丹夥拍許冠文嘅《破．地獄》將於11月上映；即將上映嘅《我談的那場戀愛》優先場口碑不俗，而且有MC張天賦同吳君如主演，相信有一定吸引力。假如傳咗會上映n年嘅《風林火山》真係落實年底上映的話，未來幾個月港片有望挽回劣勢。

更多電影文章

Winona Ryder自揭受負面報導影響無緣拍《無痛失戀》︳電影LOL

《角頭－大橋頭》台式《古惑仔》系列江湖片吸億萬票房 王陽明玩Thread爆粗出事︳電影LOL

《湄公河水鬼》越南「搵替死鬼」傳說拍鬼片 票房打低《異形》︳電影LOL

《驚天激戰》成串流收視之冠 低成本片要突圍有呢三大要訣︳電影LOL

李小龍之子李國豪遺作 《烏鴉︰重生》票房失利 製作過程障礙多多再添邪氣︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！