香港舞台劇獎︳鍾景輝8次封劇帝成歷屆之冠 藝人跨界角逐未必有著數

主辦香港舞台劇獎頒獎禮嘅香港戲劇協會（劇協），今日喺社交平台發文表示，去年底接獲多年來一直資助香港舞台劇獎頒獎禮嘅香港藝術發展局兩封來函，指藝發局聲稱「收到外界查詢」，質疑去年舉行嘅第三十一屆香港舞台劇獎頒獎禮，「活動內容直接或間接對本局（藝發局）的聲譽造成損害或不利影響」，並決定扣減該次頒獎禮最後一期資助。劇協對藝發局「草率舉措甚表驚訝，去信要求指明哪一環節或片段如何直接或間接對該局聲譽造成損害或不利影響，至今仍未收到回應」。而即將於今年4月舉行嘅第三十二屆香港舞台劇獎頒獎禮，藝發局表示「在競爭劇烈及資源有限的情況下」今年未能獲得資助。

引發爭議嘅第三十一屆香港舞台劇獎頒獎禮上，黃子華、潘燦良主演嘅《最後禮物》，同埋游學修、張錦程主演嘅《我們最快樂》都有份角逐最佳製作獎，但最終輸俾今年載譽重演嘅《大狀王》。近年唔少藝人跨界演出舞台劇，當中王菀之就3度獲提名舞台劇獎最佳女主角，但都未能獲獎。

而歷屆得獎者當中，為人熟悉嘅King Sir鍾景輝原來係劇帝之王，12次獲提名，有8次成功奪得最佳男主角。King Sir另外仲3次獲得最佳導演獎，而劇協亦喺2018年向佢頒發終身成就獎。

香港舞台劇獎於1992年舉行首屆頒獎禮，起初以小規模聚會形式舉行，到第5屆（1996年）開始與港台合作舉辦。獎項由業界成員出任嘅評審及劇協團體會員投票選出，選票直接交由會計師點票，並於辦獎禮當日即場揭曉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！