香港農青｜25歲情侶務農 日頭打工傍晚耕田 「食鮮摘蔬果開心過 high tea」

Sam 的農場「微風田園」位於梅窩銀礦洞附近，附近是熱門的行山路線。而他務農的決定，亦與一眾行山人士有關。

早在 Sam 幫忙親戚打理農場時，已經發現不少行山客支持本地農業，願意購買放在農場門口的金盞花、貓鬚草飲料。他看準現時港人對有機蔬菜的需求，「啲人識得為自己諗，食嘢會健康啲」，適逢親戚移民將農田交予 Sam，故他今年一月便開始接手踏上務農生涯。

貪靚女友鋤田餵蚊

女友 Bella 讀中一時與 Sam 相識，由朋友變成情侶，一同接觸農業。

貪靚的 Bella 落田會穿長袖、塗防曬、戴帽，「本身都係一個好城市嘅人，我係好驚任何昆蟲，連蝴蝶都驚」，但與男友務農後，「落手落腳鋤田、除草、餵蚊」，生活方式大大改變，「因為佢（Sam）同我做呢件事，就覺得好有意義」。

接觸大自然後，Bella 了解到昆蟲在大自然的角色，現時見到蜜蜂在種了金盞花的農地上採蜜、傳花粉，不再驚怕之餘，亦開始欣賞昆蟲對大自然生態鏈的價值，「覺得復耕對大自然有少少貢獻……對自己嚟講亦都有好大進步」。親眼目睹自己種的農作物收成，新鮮摘下立即品嚐，Bella 覺得比「食 high tea」更開心，「真係會有成功感」。

捨棄社交外遊「離開大嶼山都好少」

農場佔地兩萬多呎，現時由兩口子打理，種了青瓜、茄子、木瓜、菠蘿、蕃茄、咖啡豆等農作物，「前排一星期都收成到廿幾斤蕃茄」，夏季則種植沖繩苦瓜、青瓜、小南瓜等。兩人亦希望種花，「想一年四季都有唔同嘅花，冬天有金盞花、夏天會有向日葵」。

作為新手年輕農夫，Sam 坦言：「其實真係難做，要時間、要心機、要錢放落去」，「捨棄社交、假期，朋友約釣魚約咗幾個月都去唔到，真係行唔開，離開大嶼山都好少」，不少年輕人開關後到台灣、日本旅行，他們因照料農場而無法外遊。

在全日耕作的日子，Sam 和 Bella 早上到農場修剪農作物枯葉，「有蟲就即刻笠袋」，之後施肥、淋水、除雜草。如遇暴雨、打風等時節，就要收拾被暴雨吹毀的農作物，讓農田回復至可耕作的狀態。訪問前兩星期香港不時下暴雨，Sam 說：「大雨到根本上唔到嚟，到上返嚟發現啲雜草已經生得勁快勁高」。

「點解啲有機菜咁貴？以前我係唔知，到我做落就覺得好抵」，他們種的農作物不加農藥，要保護農作物遠離蟲害，就需要為每個瓜和蕃茄「笠袋」，「如果有果蠅一針咗，就會有蟲卵喺啲果實入面」。Sam指單是網袋成本已「一蚊一個」，「淨係蕃茄已經笠咗 2000 個袋」，成本高但必需，「如果見到有啲農作物真係種得唔好，個心會覺得好可惜」。不過他們亦苦笑，以上一造蕃茄為例，「其實賣出去都係蝕」。

「要生存一定要有份正職」

現時兩人並非全職農夫，家住梅窩的 Sam 星期一至六有全職工作，任職地盤工程。每日下午五時放工後上山打理農務，「農作物真係要每日上去睇吓佢，例如百幾條青瓜，逐條睇下如果生長得 OK 就笠袋」，由於農場沒有水電裝置，Sam 只能把握時間在天黑前完成工作離開。Bella 則是「外區人」，從事醫療文職，逢周末到場當「假日農夫」。Sam 坦言：「個人要生存，就一定要有份正職，然後用餘下嘅時間去做農場嘅嘢」。

Sam 在梅窩土生土長，習慣出入踏單車、感受大自然氣息，務農對他來說，「最重要係可以保留到大自然，當困住喺高樓大廈入面，大家會變成一個咩嘅人？」現在不少人談買樓置業，但 Sam 明言不想在市區買樓，「就算我要搭車搭船出去，我都想留喺度，因為呢個大自然畀到舒適我」。

雖然未能靠農業賺錢，但 Sam 不想生活設限，現階段希望先專心打理農田，而 Bella 亦對此抱有希望，「農業都係香港另一個賣點，香港都值得擁有一個有代表性嘅農產品」，就如看見「白苦瓜」就聯想起台灣一樣。

他倆未來希望在農墟擺檔，「我哋覺得呢樣嘢係可以持續落去，三至五年都 ok，但需要一步一步嚟，發展得到先有賺錢機會」。他們亦有製作花茶、金盞花護膚油，「畀多啲人知道護膚品都有本地種植嘅有機材料，如果香港自己出到呢類產品，都幾有成功感」。