香港農青｜80 後蜂農創蜜蜂拯救隊 籲市民勿噴殺蟲水殺蜂 「放一條生路」

今年三月，連登討論區一篇關於「蜂」的長文獲超過 4500 個「正評」，內容非惡搞或惹笑，而是講解「蜜蜂」與攻擊性較強的「胡蜂」的分別。帖文的「樓主」就是保育蜜蜂項目「Beetales」創辦人 Harry。他更上載自己「徒手捉蜂」的照片，向一眾「連登仔」講解遇上蜜蜂應如何應對。

樹藝師變身蜂農

Harry 本是樹藝師，早年到馬達加斯加旅行探索當地「火耕」等古代耕作方法，事前做現代農業的資料搜集時意外發現全球蜜蜂數量一直下降。聯合國環境規劃署 2011 年的報告顯示，歐美的蜜蜂數量下降了10%至30%，「返嚟香港就想學咗點樣保育先，加上香港都有呢個空間發展呢件事」。他的目標是增加香港蜜蜂數量，令保育蜜蜂成為可持續的事業。

蜜蜂是其中一個花粉傳播媒介，對農業影響甚大。Harry 指靠昆蟲傳播花粉的農作物當中，有六至七成的最大媒介就是蜂類。若蜂類數量大跌，會直接影響農作物或其他植物生長。香港暫未有蜜蜂數量的正式統計，「但我哋每年同啲蜂農去交流，佢哋都話一年差過一年」，所以對於 Harry 來說，保育蜜蜂，刻不容緩。

自學養蜂撞板「飛出嚟追住我哋」

做樹藝師免不了接觸昆蟲，但要深度了解蜜蜂，Harry 還是要請教一些老蜂農。最初他在山邊飼養一箱蜜蜂，主要上網自學，也試過撞板：「外國片好多時品種唔同，跟住網上做就試過令到啲蜜蜂好驚，飛出嚟追住我哋」，屢敗屢試，終於掌握與蜂共存的竅門。

Harry 在 2020 年創辦 Beetales，過往在室外飼養蜜蜂，近月在市區設室內養蜂場，單是東方蜜蜂就有過萬隻。Harry 指首批蜜蜂是「半買半捉」，由野外捕捉及老蜂農購入。他向記者示範打開蜂箱，「一打開其實啲蜂唔會噴出嚟，佢哋都係做自己嘢」，他把手緩緩伸進箱內，讓蜜蜂先行適應，再觀察蜂群有否出現「騷動」，再慢慢取出蜂巢板，檢查及了解蜜蜂生長狀況」。

他強調，不少蜜蜂本身就在市區生活，「希望每一區都可以養到蜜蜂，又唔影響其他人。當有人去打理蜜蜂嘅生活環境，佢哋生存困難度會減少」。

防蜂針傷心法：「慢慢 feel」

Harry 甚少被蜜蜂針到，「無帶（防護）裝備唔係我特別勁，而係做唔到啲仔細嘅嘢，對手要慢慢 feel 佢哋」。「慢慢 feel」也是防止被蜂針傷的心法，「手會慢慢喺佢哋個巢上面經過，如果見到佢哋騷動跑來跑去，就即係狀態唔算太好，就要睇下繼唔繼續」。香港蜜蜂品種的蜂后一般較脆弱，「我哋都唔想整親佢，一整親佢就會生唔到蛋」，加上蜜蜂的習性並不會輕易攻擊人類，「我唔係好大力咁整佢，佢哋唔會覺得驚，亦都唔會覺得係襲擊緊佢」。

不時有市民擔心被蜂針傷，或民居外出現蜂巢，Harry 最擔心市民動輒對蜜蜂群噴殺蟲水，務求將之置於死地。「一般狀態下佢唔會入人類嘅屋企，因為無嘢食」，Beetales 的其中一個目標是改變港人對蜜蜂的印象，城市與蜜蜂共融，「等大家見到唔會好驚，唔好用殺蟲水或者其他嘢去毀滅佢，如果香港有大部份人都可以有呢個新嘅印象，已經係好好」。

拯救隊「放蜜蜂一條生路」

為了「放蜜蜂一條生路」，Beetales 設「蜜蜂拯救隊」。若有人發現蜂巢時求助，拯救隊如人手許可會到場回收太近民居的蜜蜂。Harry 會先要求對方傳送蜜蜂位置相片，「評估同判斷究竟做唔做到」，曾任樹藝師的他有不少攀爬和安全裝備可在救蜂時使用。不少個案是一群蜜蜂在天台聚集，通常只是搬巢期間在天台暫候休息而已，拯救隊會向屋苑或大廈管理處解釋，「反正天台好少會上去，不如等多幾日等啲蜜蜂自己飛走，幾日後佢哋未走先再搵我哋」。蜜蜂被救後可送回 Beetales，或放回附近合適的大自然環境。Harry 坦言現時拯救隊人手有限，「都唔敢太大力宣傳」，正招募有志之士，「有心做呢件事已經可以」。

Beetales 的中文名是「蜜語」。到底 Harry 想跟蜜蜂說甚麼？Harry 笑著答：「其實係調返轉，蜜蜂有好多嘢想同人類講」。每年蜜蜂的生長狀態以至蜂巢的模樣都能夠帶出一些訊息，例如社區開花的狀態、環境是否適合生出足夠的卵等，「同我哋講緊佢哋發生咩事，佢哋同呢個社區嘅關係、天氣對佢哋嘅影響，不停將佢哋嘅故事講畀我哋聽。」

收人不穩「唔想未試到盡就完咗」

現時 Harry 是全職蜂農，蜂場收入不穩定，「都係困難嘅，始終都係冷門嘢」。曾試過整個月份的收入扣除租金等成本後「清零」，「有時我都會諗其實咁樣係咪最好……不過做到一半會發現，其實呢樣嘢係有個意思喺度，唔想未試到盡就完咗件事」。

現時蜂場積極拓展收入來源，包括出品蜂蜜產品如唇膏、番梘等；舉辦蜂蜜釀酒工作坊、蜜蜂知識班、教師專屬蜜蜂與自然教育工作坊、養蜂入門班等，亦希望藉此讓更多人了解蜜蜂並支持蜂場工作，「希望多啲資源營運得到」。每當有人對蜜蜂由誤解、認識、繼而接受，就是他堅持下去的動力，「我會做到完全無任何方法做落去為止」。