香港8大海南雞飯!西貢馳名海南雞油飯、最平$39一份

海南雞飯各有派別亦都各有擁躉,一份好嘅海南雞飯,由製作雞到油飯嘅過程一啲都唔簡單~今次介紹8間香港人氣嘅海南雞專門店畀大家,睇下邊間啱你食!

西貢老字號 金雞去骨海南雞專門店

位於西貢小巷入面嘅一間街坊人氣海南雞食店,招牌去骨海南雞用上湯浸熟再放入冰水,咁就做到皮脆肉嫩嘅效果,另外雞肉都已經去晒骨,食落啖啖肉啱晒懶人。雞油飯用上湯、雞油、蔥、乾蔥等製成,香氣好濃呀。

圖: chungchungcoco
圖: chungchungcoco

麻辣無骨海南雞飯 後生仔海南雞1998

由90後主理嘅海南雞小店,旺角店結業後唔少人都大嘆可惜,最近佢哋喺西九龍中心重開啦!選用頂級三黃雞,用溫泉模式浸熟,除咗原味仲有薑蔥、麻辣及花雕杞子口味,價錢又抵食,難怪咁受歡迎。

圖: Ivan_leigh
圖: Ivan_leigh

粉嶺平靚正泰國菜 雄泰

粉嶺聯和墟內一間人氣泰國菜,呢間嘅海南雞飯份量夠晒多,一份會有兩層雞,上面係髀位下層係胸嘅部份,男士都一定夠飽!油飯香而不膩,配埋泰式醬汁酸酸辣辣好開胃呀。

圖: Maktze、 yanpp828
圖: Maktze、 yanpp828

溫泉海南雞 全日雞實驗所

識食梗係食全日溫泉海南雞髀飯餐,雞皮有彈性,而且無肥膏喺夾層,肉質嫩滑得嚟有咬口。油飯選用金鳳米,有淡淡雞油香、香茅同紅蔥頭嘅味道,配埋三色醬汁食好惹味。無味精嘅湯底雞味香濃,同時有海底椰鮮甜味道,值得一試。

圖: silverthoughts
圖: silverthoughts

前五星酒店廚師主理 勇記海南雞

由前君悅酒店廚師主理嘅海南雞專門店,喺海南雞關注組受到好多網民嘅追捧,個個都大讚雞肉嫩滑賣相又靚,繼紅磡本店後幾個月前喺上環開埋分店啦!海南雞皮爽肉嫩又無骨,有淡淡滷水香氣,點埋泰式辣醬食又另一番風味。

圖: CHOCOLEI
圖: CHOCOLEI

最抵食海南雞飯 粉紅水門雞

呢間海南雞飯以抵食而聞名,一份海南雞飯只係$39就食到!唔好以為賣得平質素就唔好,選用三黃雞,將原隻雞放入加咗香茅、斑蘭葉同檸檬葉嘅湯水裏熬一個鐘,雞肉滑嫩。油飯都係用心之作,選用泰國香米,加入香料一齊炒香後再用雞湯煲,粒粒分明香料香氣突出。

圖: tammylam123
圖: tammylam123

泰國地道風味 水門雞飯

好有泰國地道風味嘅海南雞飯,水門雞飯皮下脂肪較少,清爽唔油膩,幾有雞味,雞皮爽口彈牙。而熱辣辣嘅油飯味道適中,粒粒分明。配飯嘅湯胡椒味強勁,刺激過癮,但可能就未必個個啱飲啦~

圖: sharonsharonn
圖: sharonsharonn

白雞+特色燒雞 文華雞飯(新加坡)

老闆曾經於新加坡當地開店賣雞飯,最後回流香港開店。選龍崗雞再用以斑蘭、香茅等香料熬製嘅上湯將雞浸熟。最特別係除咗白雞更設有燒雞,前者雞味濃郁,後者外皮香脆有焦香,仲可以揀雙拼㗎!

圖: llmc
圖: llmc

文: Yanica