香脆鬆軟！精選香港6大牛角包

散發住陣陣嘅牛油香，金黃香脆嘅外層加上一層又一層鬆化嘅酥皮，你話呢個世界上又點會有唔鍾意牛角包嘅人呢～今期開飯仔為大家搜羅咗6間超人氣嘅牛角包，有來自外國嘅過江龍名店、亦有酒店餅房名廚開設嘅麵包專門店同埋一啲本土小店，一齊睇下邊款啱你口味！

天然無添加麵包 品穀

本土麵包店，由一對藍帶畢業嘅兄弟主理，因為佢哋有感坊間嘅牛角包太多添加劑同防腐劑，所以佢哋嘅麵包店就主打天然無添加。最受歡迎嘅牛角包，選用法國有機麵粉混合日本麵粉同A.O.P牛油，再加上佢哋使用獨特嘅方法摺疊出25層嘅酥皮，除咗香脆鬆軟富牛油香呢啲基本嘢，牛角包比一般更大件同鬆化，口味多樣化如芝麻、抹茶、杏仁口味等。而且由搓麵團、發酵到烘焙完成足足需要三日，誠意滿滿。

緩慢發酵法 Maison Eric Kayser

來自法國嘅麵包專門店，一直推崇正宗法國手工製麵包，店舖最出名係佢地哋嘅酥皮麵包均沿用液體發酵同緩慢發酵法，曾經喺巴黎同紐約獲選為最佳牛角包。牛角包除咗原味，重有多款鹹口味，如吞拿魚及煙三文魚蛋沙律牛角包等。

法國烘焙名店 Gontran Cherrier

由國際知名糕餅主廚Gontran Cherrier主理，喺全球有超過50間店舖。麵粉同牛油等材料都由法國直送，每個步驟都人手製作，難怪日日都排長龍。招牌牛角包外層酥脆內層柔軟，重有好香牛油味添。特別推介大家試杏仁味同Raspberry Cloud，前者有一片片杏仁同杏仁果醬，口感同味道都好豐富；後者就放滿蛋白糖霜同Raspberry，味道酸酸甜甜幾開胃。

酒店前行政總廚主理 Bakehouse

麵包控一定對呢間麵包店唔陌生，由四季飯店嘅前任餅房行政總廚主理，主打傳統手工製作嘅麵包，全部產品都係每日新鮮製作，採用法國傳統麵粉，用料講究。招牌牛角包短短一星期就可以賣出超過2,000個，添加新西蘭Canary牛油，比較挺身，每層都做到薄而香脆，煙韌有致，更充滿牛油香。

台灣過江龍 八月堂

來自台中嘅人氣牛角包專門店，喺香港都已經愈開愈多分店喇，每次行過都聞到好香～為咗令大家喺香港都食到同台灣店一樣嘅味道，可頌麵團會從台灣運到香港，選用歐洲頂級牛油、日本百年品牌麵粉同ISO認證雞蛋。想食返最原始牛油香氣，必試原味蜂巢可頌，多層次摺疊手法配上長時間低溫發酵製成，一切開見到蜂巢般嘅氣孔就知道唔簡單。另外仲有吉士、朱古力、黃金流沙等十幾款口味，唔怪之得登陸香港咁耐都咁受歡迎。

龍蝦湯流心牛角包 享慢煮意

呢間人氣小店以慢煮為概念，必食一定係招牌龍蝦湯流心牛角包，焗至香脆嘅牛角包，一切開有熱辣辣嘅龍蝦湯流出嚟，除咗打卡一流，入口每一啖都係濃厚嘅牛油香同龍蝦湯味，好有驚喜。另外爆漿蟹膏流心牛角包都一樣鮮味滿滿。鍾意食甜嘅，有肉桂蘋果流心同海鹽焦糖咖啡流心口味揀呀～

文: Yanica