馬浚偉自爆抱病開個唱 王喜拍片直斥︰一睇已經知係大話

早前完成6場個唱嘅馬浚偉，喺演出頭三場之後凍親導致聲帶發炎，更於台上自爆食藥後個嘴、氣管及喉嚨出現嚴重過敏，黏膜破裂甚至舌頭腫脹隨時出血，要工作人員隨時候命為佢止血。

近年移居英國嘅王喜，早前就馬仔抱病開show嘅報導拍片評論，言論句句有骨，直斥「一睇已經知係大話」，又指有人「講啲3歲細路都唔信嘅故仔」。

王喜條片以《如果我係馬浚偉經理人》為題，先讀出馬浚偉演唱會上自爆帶病上台嘅報導，以寸爆口吻斟酌當中用字「自爆即係唔係人哋嚟問你啦？即係吸引唔到有人嚟問你啦，又或者冇人關心，又或者冇嘢值得人關心啦，於是乎先係自爆」，又恥笑報道所寫「無預警過敏」。「乜有啲過敏會預先發個Message或者E-mail畀你，話我準備有過敏反應㗎喇啵，你Ready未呀？」。

讀完篇文，王喜就話如果報導內容唔係無中生有的話，「一睇就知係大話啦……當睇嘅人會信喎」。之後王喜列出5大疑點，首先馬仔話因為溫差大而病倒，阿喜就回應話平時出入冷氣地方都好大溫差，比11月嘅天氣變化更明顯，再直抽一句「哦，開演唱會就聲帶發炎」。

另一點王喜認為係大話嘅，就係如果馬浚偉真係因為食藥導致病情更差，就應該開記者會公開交代藥物名稱同處方藥物嘅醫生姓名，以免其他人中招。王喜再質疑，馬仔自稱要入院打針治療，但竟然冇傳媒影到，又或者助手同經理人都冇幫佢影相交俾傳媒。馬浚偉聲言唔想歌迷擔心失望而堅持開show，阿喜就話唔明點解歌迷擔心，更寸對方「有得退票就唔會失望」。

去到最後，王喜指出，馬浚偉話舌頭腫脹要工作人員準備止血，但係「條脷有血點止血？」。王喜又提到馬帶病演出，居然冇觀眾聽得出，「答案只有一個，就係咪咀」。去到尾王喜再補多刀話「有啲成年人只係講到啲三歲細路仔都唔信嘅故仔嘅」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！