驚蟄｜鵝頸橋打小人生意疫後好轉 旅客愛「打」病毒 檔主：近年無人「打」官｜Yahoo

今天（3 月 5 日）為驚蟄，剛過去的週末已有不少善信早著先機到鵝頸橋打小人和祭祀。《Yahoo 新聞》記者於早上 11 時到場視察，已有 8 檔打小人檔口開檔，全場打小人每份劃一 50 元。中午 12 時起善信人數增加，大多要輪候至少 20 分鐘才能開始儀式，當中不少為馬來西亞、台灣和大陸遊客。

台灣客專程來港打小人

金師傅於鵝頸橋開檔約 10 年，朝十晚七。她指客源有八成是旅客，台灣最多，「佢哋睇完小紅書嗰啲網紅介紹呀嘛，有啲台灣客真係專程嚟香港打小人」。金認為，生意雖比疫情期間好，但整體仍未回復至疫前高峰，「而家好蕭條、好靜，可能經濟唔好」。疫情過後，金觀察到多達六成善信愛「打病毒」，「疫情之後人人都注重咗健康」，其餘則愛「打」上司下屬、金錢糾紛、誹謗、流言蜚語等。

談到近年是否仍有港人「打」官員，金師傅指，自特首李家超上任後就不再見港人以官員作為打小人對象，「好奇怪喎，反而佢上一任就仲有」，「佢做得好嘛，得民心者得天下」，例如舉辦各樣美食節、夜繽紛活動，「你做得唔好，行出街啲人都想打你啦！」被問到假若有顧客欲「打」官員，金師傅認為不會誤墮法網，「打衰氣無問題㗎！當官都可以有小人㗎嘛，都係祈求香港好經濟好」。

長駐鵝頸橋達 20 載的麥仙姑，由早上8時已開始密密「打」，驚蟄前夕及正日更需通宵達旦連續開檔逾 20 小時。她指目前生意已回復疫前水平，多數接本地客，內地客僅佔三成。麥指港人大多只求打走衰運、順順利利，部分亦會指名道姓「打」生意對敵，惟近十年八載則較少有人「打」官員，「無乜必要啦，對自己又無乜影響」。至於會否因怕墮法網不敢「打」官，她稱不會逐個翻查客人寫下的小人名字，「我唔知佢哋寫咩，我嘅責任就係打小人，係做呢行工作㗎嘛！」

善信不「打」官：何必呢？

Apple（化名）近年驚蟄前夕都到鵝頸橋做各類祭祀儀式，今年屬兔的她除了打小人，亦完成祭白虎、攝太歲等儀式，「舊年身體唔係幾好，見我個仔舊年做咗（打小人）幾好，今年都嚟做吓」。Apple 指打小人時不宜指名道姓，「你打人又唔好，畀你打嗰個都唔好，你點知人哋係咪想害你先，最緊要係小人唔好埋身啫」。對於市民未必會「打」官員，Apple 坦言或與政治環境有關，「何必呢？」她寧可祈求自身運程，「政治嘅嘢唔係我哋做」。