魔鏡歌詞網Mojim.com 突然關站 成立19年疑似一夜消失網民震驚

唔少網民搜尋歌詞時，都去過台灣嘅魔鏡歌詞網（Mojim.com ），「更多更詳盡歌詞在※ Mojim.com 魔鏡歌詞網」呢句「水印」相信大家都見過。不過有網民發現，由星期一（7月1日）開始無法連上魔鏡歌詞網網站，數以萬計華語、日韓甚至歐美流行曲歌詞隨時一夜消失，成為華語網路界一大新聞！

魔鏡歌詞網成立於2005年8月，主要由網民提供歌詞，由於資料齊全，加上排列方式方便搜尋歌手歷年專輯等內容分類而深受網民歡迎，只要喺搜尋器輸入歌名，好多時都會指咗去魔鏡嘅頁面。

魔鏡歌詞網同唔少網站一樣，以頁面廣告賺錢。網站其實由2008年起成為台北市音樂著作權代理人協會（MPA）合法歌詞業者，並為會員名單網站之一，換言之魔鏡歌詞網並非盜用創作人知識版權圖利。

唔少網民都對魔鏡歌詞網一夜消失感到不捨，仲話係「時代的眼淚」。但亦有網民記得魔鏡歌詞網過去曾經停止運作幾日，之後又再出現返，大家可以睇定啲！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！