黃偉文倫敦時裝週睇騷遇意外 現須休息觀察：幾乎變了遺照

著名作詞人黃偉文（Wyman）近年長居英國，仍不忘於社交平台分享生活近況。隨著2024秋冬時裝週開鑼，熱愛時尚嘅Wyman當然會參與呢場時尚界盛事；昨日（20日），Wyman出席BURBERRY喺倫敦舉行嘅2024秋冬時裝騷期間發生意外，Wyman直言：「這張幾乎變了遺照。」

Wyman前日（19日）分享10年前後參加倫敦時裝週嘅照片，表示自己到倫敦嘅交通方法已轉變：「給10年後的我。前後10年，再次在倫敦參加 Burberry 的活動和時裝表演，不過，以前坐飛機來，今日搭地鐵去！設計師換了三位，各擅勝場。賓客仍然同一個，忠誠如一。」相隔一日，估唔到佢竟然出PO報平安；原來Wyman喺睇騷前發生小意外，寫道：「昨晚發生了點小意外，這張幾乎變了遺照。（但為了時裝，我都忍痛堅持下去，並且睇了場好好睇的 show ）現在回家休息和觀察，如果未來一兩天沒有暈眩和作嘔或者其他異樣⋯⋯會做更多善事和買彩票。」

雖然Wyman未有詳述意外經過，但從佢嘅描述中，估計佢係跌倒，Wyman亦提到自己之後一邊頭痛一邊繼續等開場睇騷：「之後仲識爬返起身一邊頭痛一邊覆whatsapp同香港嗰邊傾歌詞點寫。然後仲堅持要睇show等開場時仲識同旁邊嘅人有講有笑，而家仲識發ig，希望係好兆頭，所以大家唔使擔心住，如果唔係就真係死在天橋底，啋啋啋」。即使Wyman仲有力氣講笑，但唔少網民都留言叫Wyman保重身體，提醒佢多注意身體狀況，又建議佢去醫院做檢查。去到今日凌晨時分，Wyman喺IG出Story報平安：「今日冇暈又冇嘔，應該ok，多謝大家關心，Feel到大家的愛」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！