黃妍無懼被定形拒迎合市場 貼地呈現文學世界：將擅長喜歡嘅事做到最精緻就會有人鍾意

「唱作歌手」黃妍Cath一向以文青形象示人，早前分別喺香港同英國開完個人演唱會，之後又推出新專輯《4891》 ，更加去到日本拍攝歌曲《哀傷的作者》MV，還原樹上春樹作品《1Q84》嘅經典場景，以音樂帶領樂迷走入一段文學旅程。為咗今次嘅音樂企劃最終章，Cath亦都舉行咗幾場展覽，嚟緊仲會衝出香港，將展覽移師到東京，延續呢段旅程。唔講唔知，一直俾人覺得係文青嘅Cath原來都有麻甩嘅一面，甚至試過連同事都唔認得，究竟佢心目中嘅自己又係點嘅呢？

專輯《4891》致敬樹上春樹作品 貼地呈現文學世界

Cath今次嘅專輯名《4891》其實就係將樹上春樹作品《1Q84》顛倒而成，設合新碟內同人小說嘅顛倒世界而成。唔講唔知，專輯內嘅小說其實係印製前一個月先決定要做，更加係Cath同創作人王樂儀只用咗兩個星期完成：「原本係做劇照咁樣寫Caption，其實我一路都覺得唔係好夠嘅，但係我都冇出聲，大家都冇一個好大嘅Intention去做。去到要印碟前我哋再開碟會，導演Pazu就話覺得要有厚度，因為Base on本小說做靈感，嗰下我都好同意嘅，雖然知道個困難嘅地方喺邊到；佢話要大概50版左右，但係會有啲排版幫輕吓，但係要有嗰個厚度，我係覺得需要有，同埋覺得我係想做嘅。」之後，Cath就決定同王樂儀用書信形式創作，代入故事主角之餘，亦都喺原著同原創之間搵平衡，創作出現時專輯內嘅小說。

可能好多人對文學嘅既有印象就係好艱澀難明，不過對於Cath而言，文學同我哋嘅生活其實好息息相關，每個文學故事都同我哋嘅日常好貼近，所以為咗可以好好呈現俾大眾，所以喺呢隻專輯入面，幾乎每首歌都有由Cath同同事打造嘅活動，例如係為《天光前》打造嘅Cafe tour，務求更貼地咁將信息帶俾聽眾；而嚟到「文學旅程」嘅最終章，Cath甚至喺尖沙咀同銅鑼灣設置咗兩個顛倒世界嘅展覽，分別呈現故事中兩個世界，而呢個展覽喺9月更加會衝出香港去到東京舉行。

新歌《哀傷的作者》MV日本取景天公造美

新歌《哀傷的作者》MV去到日本取景，原來並唔係一開始就決定好。Cath原本只係打算去日本放假休息下，結果作為村上春樹迷嘅導演Pazu就提議去到日本取景，還原《1Q84》入面提到嘅場景，例如係穿越嘅天橋、車站同公園等等，仲搵嚟日本團隊參與拍攝，更得到天公造美，拍攝兩日既有櫻花盛開，又有Cath想要嘅雨天，打造出MV中一幕幕嘅動人畫面。

講到MV中Cath最鍾意嘅畫面，就要數男主角小野喺公園衝入電話亭嘅畫面：「小野入咗去係痛哭啊，因為佢好想搵女主角，但係其實喺嗰個世界入面女主角係佢唔認識嘅一個人，即係女主角係存在嘅，但係佢想像緊女主角係佢心愛嘅人，但係總之佢就係搵唔到，想打俾又搵唔到所以喺到痛哭。大家已經係『抖唔到氣』，然後喺佢個幕之後就係成個MV嘅最後一個Shot，就係我要去望住個無人嘅韆鞦，嗰下我係覺得好感觸，因為我無諗過去到真實嘅嗰個地方，佢好似完整咗我睇小說嘅時候嗰個畫面，然後覺得係我成個Project最後嗰個Shot，我係覺得好唔捨得，同埋係感受到好多人嘅力量，所以嗰下都係真係有啲感觸嘅。」

演唱會以恐懼為主題 撞正媽媽患病感受到身邊人力量

早前Cath就喺香港同英國舉行個人演唱會，以恐懼作為主題，原來同佢自身都有好大嘅關係。Cath透露自己其實有一個口頭禪，就係做所有嘢之前都會話「唔得」同「好驚」，不過事實上佢又係一個好硬頸嘅人，只要決定咗就會出盡力一定要做到；而佢亦都分享咗兩個自己嘅恐懼，就係水同離心力。因為曾經遇溺同遇上朋友車禍離世，所以水同離心力就一直成為佢唔敢面對嘅事，最嚴重甚至係搭車時司機踩多咗油揸快咗都會驚；不過慢慢當佢知道自己嘅恐懼，嘗試搵到應對嘅方法同面對，就會發現恐懼往往都係自己想像而成，將事物過度妖魔化而成，當你肯踏出第一步，恐懼就會好易被克服，人生亦都會易過啲精彩啲。

一直以為Cath係一個睇落比較柔弱，行開文青路線嘅女仔，不過原來佢都有好硬朗嘅一面。喺演唱會香港場舉行前，Cath嘅媽媽就確診患病，屋企人陷入一片凌亂：「大家都好不知所措，情緒都搞唔掂，我發現我係最硬淨嗰個，好似好冷血，但係就好理性將所有要處理嘅嘢逐件逐件拆⋯⋯嗰段時間好感受到身邊嘅人俾我嘅力量，大家都知發生咩事，但係第一句都唔係問我阿媽點，係問我點。開頭就覺得好奇怪，我又覺得冇乜嘢喎，咁後尾就知啦，因為之後過咗就會感受到個情緒同壓力有幾大。但係喺個Show到我感受到在場所有人，無論係Fans、bandmate定係同事們俾我嘅力量都好大，呢個係好感動。」至於，一向可以好好平衝情緒同技巧嘅Cath喺英國曼徹斯特場就更加首次喺舞台上「吹沙入眼」，忘我演出，將情緒抒發。

無懼被定形不迎合市場 將擅長喜歡嘅事做到最精緻

對於自己嘅文青形象，Cath就話從來都唔覺得自己係文青，更加話相比起文青更覺得自己「麻甩」同似個「阿婆」，更笑言：「覺得我嘅性格同習慣好「阿婆」囉，我係唔鍾意出街，宅到要啲同事逼我出街，我會喺自己嘅小露台種菜、種薄荷，潤唇膏又係自己整，好古舊，鍾意煮嘢食睇書，咁我以為呢個世界所有人都係咁，但係入咗行識多人先發覺原來自己好奇怪，咁唔緊要啦咁咪繼續奇怪啦，發現呢個奇怪就戴上咗『文青』呢個稱號，我自己唔抗拒，呢個係大家第一步去認識我最快捷嘅途徑。」

Cath亦都直言唔擔心被觀眾定型，因為自己係一個渴求新鮮感同進步嘅人，喺音樂上亦都會不斷有突破，所以會繼續學唱歌，挑戰唔同曲風，亦都已經開始為下一個音樂企劃做準備。佢亦都話與其不斷因應市場去行，自己更加會做真心喜歡嘅事，因為會上力好多，雖然曾經遇到唔少質疑聲音，自己都有過迷惘，不過佢確信「喺擅長嘅地方、喜歡嘅地方，將嗰件事做到最精緻啲，做到極致，可能就會有一堆人鍾意嗰樣嘢。其實有人喜歡我就已經好鍾意，呢樣真係要去到初心。」