黃心穎無預警復出 情人節出歌反應兩極 網民:勇氣可嘉
黃心穎喺2019年爆出偷食人夫許志安,車內纏綿嘅片段全城哄動,二人形象雙雙跌落谷底,事業一鋪清袋。喺噚日(12日),絕跡幕前嘅黃心穎突然喺社交網站上載一條影片,宣布於情人節(14日)推出新歌《Crown Me》,復出幕前做歌手。
潛水近四年嘅黃心穎,喺噚日突然於社交網站上載新歌《Crown Me》MV預告,雖然預告僅得20秒,不過已經見到佢轉咗3個造型,及與多個舞蹈員合作,製作絕不馬虎。影片推出後,網民反應不一,有網民認為可以俾機會佢:「好欣賞你經歷咁大件事都可以企返起身,我真係做唔到」、「支持心穎 心穎加油」、「心穎好正 其實都係衰一次啫 大家原諒佢好無?」、「勇氣可嘉」、「加油!人誰無過」及「加油,從新出發」等等。不過亦有網民認為佢厚面皮及唔睇好,留言「果然掌握到『只要你唔尷尬,尷尬就是別人!』」、「臉皮成米厚 勁」、「算!吧!啦!」、「慳D啦」、「真係O晒咀 乜會有人睇佢咩」、「佢仲想撈娛樂圈呀?真係厚面皮」及「真係以為『會過去的』?」等等。
黃心穎喺接受傳媒訪問時指新歌及MV會於2月14日同日出街,希望大家可以多多支持。另外,被問到點解揀情人節出歌曲,係唔係想正式公開與泥猛嘅戀情,佢就話自己唔慶祝情人節,及並冇特別原因。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!