黃心美相隔6年回歸ViuTV 曾經歷8個月冰河期低潮

黃心美（Scarlett）曾於Now TV及ViuTV擔任主持，更有「ViuTV一姐」之稱。2017年，黃心美被驗出甲狀腺指數高企，需要戒口及定期檢查，醫生甚至勸佢轉行減少壓力。不過，黃心美於2018年11月選擇離巢ViuTV，以自由身藝人身份工作。相隔近6年，近日有傳黃心美回巢ViuTV，官方亦宣布佢將會出席即將舉行嘅《ViuTV年中無休2024節目發布會》，黃心美又於社交平台間接確認消息。

黃心美坦承離開ViuTV後曾有長達8個月無工作嘅冰河期，又曾經歷妹妹黃心穎「安心事件」及父親黃沛霖病逝等低潮，更有一段時間好怕面對記者，選擇收埋自己。不過黃心美沉澱後反變得堅強，重新尋找新機會，曾為HOY TV《男士堂》擔任主持，以特別嘉賓身份拍攝J2台《超級毛特兒大賽》，亦頻頻接活動主持工作。近日，ViuTV預告即將舉行《ViuTV年中無休2024節目發布會》，出席藝人名單驚喜見到黃心美。黃心美早於本月初於社交媒體上已透露自己已投入拍攝，更前往大澳取景：「為咗拍攝節目，今日第一次入大澳，好鍾意呢個地方，唔煮飯嘅我買咗好多醬料返屋企，仲俾我食到好好味嘅蝦膏蒸腩片同埋沙翁。」對於回巢ViuTV，唔少網民都留言表示期待，黃心美亦親自回覆：「See you on Monday」，間接確認將回歸ViuTV。不過，黃心美早年離開ViuTV時表明係因為自己想要大啲自由度，雖然ViuTV畀佢喺出面接Job，但就唔想逗緊人哋份糧，又冇嘢畀返對方，因此未知是次黃心美係以咩形式回歸ViuTV。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！