黃秋生承諾一萬like就拍動作片 網民勁踴躍極速達標：你拍咩片我都會支持！

現年62歲嘅影帝黃秋生，雖然近年演出作品大幅減產，不過照樣入圍多項影帝獎項，除咗憑《淪落人》喺2019年獲得金像獎最佳男主角之外，前年亦憑《白日青春》奪得台灣金馬獎最佳男主角，演技實力無容置疑。去到今日（8日），黃秋生喺Facebook出PO問網民想唔想睇佢拍動作片，仲話如果有1萬個支持，佢就會拍，結果引起網民哄動大呼支持，1萬個支持已經極速達標。

黃秋生喺Facebook出PO寫話：「想唔想再睇我再拍動作片？其實我自己都驚。如果有一萬個支持，我就拍。唔係港產 like to see me star in an action movie again ？not HK production. 想再看我演動作電影嗎？有一萬支持我便考慮，絕對不是港產片，也絕對不是色情狂想像那些。（ 其實超出我而家能力之外，如果做，我係同佢死過。袁崇焕話齋，X那媽！頂硬上！）」，結果獲得大量網民支持，直至今日中午1時已經超過2萬like。網民留言支持秋生拍戲，例如「好老實咁多套葉問你嗰套最好睇。梁朝偉演緊自己，甄子丹都係演緊自己，得你係演緊葉問。希望你有好戲開」、「你拍咩類型嘅戲，我都會想睇的」、「你仲有冇練緊劈掛？如果有我信你仲有身手拍 亦都想睇 去馬吧 好耐冇見到你新作品了 期待」、「加油~ 準備頂硬上咪走數~~」、「你拍咩都想睇㗎啦，講經咩」、「支持！ 唔好浪費一身好功夫」、「秋生哥，你拍咩片我都會支持！」、「絕對支持！不過以秋生兄既身形同氣質，唔適合拍拳拳到肉既動作片。揸槍啦！用槍就fit到漏油喇。（真心建議）」、「支持，你做既葉問絕對經典 我只會認同你演既葉問」、「秋生哥拍乜戲我哋都捧場啦」、「咩戲都拍吓啦，大佬，餓你啲戲好耐喇」及「只要係你拍嘅任何戲，我相信大家都會支持!」等等。

同時亦有擔心佢身體狀況，留言「想俾like 但都怕你辛苦，始終動作戲係要體能爆標」、「我當然想看，但你也要考慮身體狀況！加油努力」、「好想支持你！但又！擔心你！」、「想睇，但要小心身體」、「支持但仍希望你是安全下去做。如果影響身體太多，我就唔支持。寧願支持你演其他電影」、「支持，但要錫身，講真年紀也不少了」及「緊係支持 但量力而為」等等。另外，亦有網民表示反對話「唔支持, 動作片留返俾後生仔做啦. 年紀大左, 夾硬來搞到唔上唔落, 就核突啦.」，之後獲得本尊回覆：「係咩？唔做就話唔得嗱？呢啲就係成功同失敗嘅分别。就算失敗，人生總算盡咗力。」唔知大家又支唔支持黃秋生拍動作片呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！