（最新︰艾粒就事件道歉）出浴照被公諸於世 商台DJ余迪偉鬧爆艾粒︰性取向歧視同埋職場欺凌

（最新 － 少爺占同Donald下晝分別喺IG出post向迪偉道歉，並表示得知迪偉已接受道歉，而艾粒會更改餘下場次節目內容，並承諾以此為鑒，日後會更加小心顧及所有人感受。）

由少爺占同Donald組成嘅艾粒（ILUB)，經常喺節目入面嘅廣播劇拎同事開玩笑。艾粒嘅演出《Part2 ! 王鳳女士XYZ 銀河道士大匯演》尋晚開show，演出當中拎其中一位同事余迪偉嘅浸溫泉玉照放喺大屏幕，結果惹來迪偉喺IG發火鬧爆。

迪偉尋晚喺IG寫道「Enough is enough! 你哋都玩咗咁多年啦，我都冇出聲咁多年啦，你哋都有頭有面有地位，仲玩？呢張相係我IG嘅，有冇經過我同意上你哋個大台去賺錢呢？呢單嘢係性取向歧視同埋職場欺凌！」。帖文至截稿時有4千幾人like，唔少網友留言撐迪偉，亦有人提出迪偉係咪「曲線幫艾粒宣傳」。

艾粒嘅廣播劇成日拎余迪偉開玩笑，有時用「迪奶俱樂部」、「迪奶個後花園」嚟講笑，相當有味。而商台其他DJ同埋歌手都會成為取笑對象，聽眾以為艾粒同佢地friend所以冇所謂，但係發火開聲鬧艾粒嘅，迪偉可能係第一個。

原名余國雄嘅余迪偉，多年前喺加拿大嘅電台工作，後來回港加入商台做製作統籌，2005年轉職做主持，而家同Do姐鄭裕玲、余德丞及傑朱主持《口水多過浪花》。而被迪偉鬧爆嘅少爺占同Donald，喺商台除咗係主持之外仲係高層，阿占係音樂總監，而Donald就係商台總監，難怪被指摘係「職場欺凌」。而到截稿時少爺占同Donald都未有回應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！