【C9特工】高海寧替身何佩珉 功夫新星8年時間變副武指

又係高海寧擔正嘅《C9特工》，雖然高ling已經瞓身演出，但都係收視平平。既然高ling嘅角色係前特工，劇中唔少打鬥動作場面佢會自己上陣，但係一啲由二樓跳落街、由爆炸廠房逃生嘅危險場面，都需要替身幫手。其中一位高ling替身原來係由幕前轉做幕後嘅藝員何佩珉。

今年29歲嘅何佩珉，細個喺屯門友愛邨長大，本來屋企人安排佢去學芭蕾舞，點知5歲嗰年轉去學功夫就一試愛上，小學時期仲加入過香港武術隊。2011年，讀緊護理學課程嘅佩珉，參加TVB武術選秀節目《功夫新星》奪得冠軍而入行，並且成為八十年代TVB武打女星楊盼盼嘅徒弟。

因為樣子甜美身型嬌滴滴，入行後何佩珉反而被安排做行行企企小角色，直至有人搵佢做替身，反而搵到滿足感，於是轉向幕後發展，做替身以外亦會幫手培訓要拍打戲嘅演員。

本來喺《C9特工》檔期推出嘅劇集《唐人街》，裡面有唔少打鬥場面，何佩珉正是《唐》嘅副武術指導，負責訓練演員。佢話工作比起演員更辛苦，通告接住落之餘，仲要睇片研究演員動作。

而家何佩珉係TVB唯一擁有「演員」同「武行」身份嘅藝人，舊年出街嘅《鐵探》何佩珉又跳返做幕前，飾演冷血狙擊手，演技令觀眾眼前一亮。

聽落硬淨嘅何佩珉，舊年3月同工程師男友結婚榮升為人妻，出嫁時有醒獅送出門，好有氣勢。佢仲話即使婚後都唔會為咗錫身唔接打戲，希望盡做！