12怪盜︳憑票尾抽獎見MIRROR KOL踢爆大量場次變「神功戲」怒批電影公司

MIRROR首套全團參與電影《12怪盜》喺復活節檔期上映，票房已經衝破1500萬。向來鏡粉支持偶像出錢又出力，電影亦舉行多場謝票場俾fans睇戲之外仲可以見鏡仔。

呢期MIRROR飛咗去北美開show，而電影公司就舉辦活動，只要憑《12怪盜》4月4至14日嘅戲票飛尾，就可以參加抽獎，隨時有機會喺4月23日嘅「團魂見面會」一次過見晒12個鏡仔！

一路有發文力推港產片嘅KOL鬼哥，尋日出片提及《12怪盜》近期有戲院晨早場嘅場次「全院滿座」，令佢懷疑係咪有fans買飛唔睇戲搏抽獎機會，於是佢決定去戲院了解。

鬼哥上周末買咗其中一場《12怪盜》早場飛，佢話佢買到嘅場次，據影院網頁顯示有8成入座，鄰院更加係全滿，但到佢入場後就發現觀眾只有小貓三幾隻。鬼哥之後潛入「全院滿座」嘅影廳，居然空無一人！鬼哥更推斷，有人主力買長者平價飛，因為反正唔會到場，唔駛check長者卡。

鬼哥拍片時話睇到戲院出現「神功戲」場面時，直言感到心噏，「大家同心協力拍套戲，唔係應該同電影本身質素去吸引人入場嘅咩？」。鬼哥更質疑MIRROR所屬公司Makerville「好唔好意思」將呢啲「神功戲」票房納入總票房，反問有冇考慮過會有「買飛搏抽獎」嘅情況。

至於fans俾錢入場睇戲睇幾次，鬼哥認為無可厚非，甚至覺得偶像效應之下「十刷」「八刷」都係電影成功因素之一，但佢感慨有fans係為咗謝票場先買飛，唔會睇晒成套戲，甚至係播放個幾鐘先入場，等鏡仔片尾現身謝票。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！