雅虎香港新聞 2022人物｜覆核王郭卓堅免針紙案勝訴成代表作 擬退下火線：再打落去終有一日坐監
【Yahoo 新聞報道】「長洲覆核王」郭卓堅過去16年申請過60次司法覆核，輸多贏少，屢敗屢戰。今年 9 月政府宣佈多名醫生涉濫發的2萬多張「免針紙」失效，他氣上心頭入稟挑戰政府決定，大眾不抱期望之際，郭卓堅卻罕有勝訴，一度令當局暫緩措施，成為郭的代表作，「呢場贏得好漂亮！」多年來他為了追尋公義，一度被頒令破產，須靠綜援過活，卻無損他為民請命的鬥志。走到今年，84 歲的郭卓堅卻感到灰心，接受《Yahoo新聞》專訪時預告將退下火線，「打（醫務衛生局局長）盧寵茂嗰時，我每朝 6 點鐘睇吓有無人敲門，你想唔想喺監房過一世吖？」
文字記者：盧珮瑤
攝影記者：Oscar Liu
往高等法院的路上，郭卓堅步履蹣跚，每走幾步就要稍作休息。他習慣隨身帶著《基本法》，談到覆核權，他打開該書讀出第 35 條：「香港居民有權對行政部門和行政人員的行為向法院提起訴訟」，「呢個係中央畀我哋嘅權力嚟，唔通你唔啱都唔可以講？」一個信念，造就他16年的覆核戰績。
【新聞專題：2022 年大事回顧】
「仲信有青天」
今年9月7名醫生涉濫發2萬多張免針紙被捕，政府宣布所有免針紙失效。郭卓堅看不過眼，「我開始諗點解無人出聲嘅？成個立法會無人出聲？佢（醫務衛生局局長盧寵茂）無權咁樣做㗎喎！」他遂提司法覆核，「2萬幾人經過專業醫生診斷，如果你要講啲免針紙有問題，唔係一刀切免晒，要逐張逐張睇；如果醫生判斷錯誤，你只能夠由醫委會度話佢專業失德」。
10月21日，法官高浩文頒下書面裁決，裁定政府敗訴，指局長無權宣布涉案免針紙無效，下令撤銷其決定。郭卓堅為之自豪，「呢場係贏得好漂亮，個官判得幾好，都仲信（法治）有青天」。不過政府敗訴後四天迅速修例，賦權醫務衛生局長在有合理理由懷疑下，宣告個別醫生所發「免針紙」失效。郭卓堅又跑到法庭去，指政府修例後受影響人士無上訴機制，要求法院推翻新例但遭駁回，郭也深知勝算不高，「之前判郭卓堅贏證明佢啱，證明你（政府）以前係做錯嘅」。
「相信公義就唔理得咁多」
郭卓堅於台灣大學修讀法律出身，由於香港不承認台灣學位，他回港在政府法律部門擔任文員，隨後轉行做中港貿易。「做貿易都叫賺到啲錢，後來乜都無晒」。郭曾於長洲東堤小築購置 3 個單位，後來為打覆核案全數售出，套現約100萬元。2020年7月，郭被指拖欠律政司訟費逾156萬元被頒令破產，案件包括2016年就鉛水事件要求房屋及運輸局局長及水務署署長依法監管所有樓宇食水喉的安裝、2017年質疑前特首梁振英宣誓有效性等。郭均被裁定敗訴，須向答辯人支付訟費。
「咁多年輸多過贏」，郭卓堅由 2006 年開始進入司法覆核殿堂，至今提出的覆核達60宗，勝訴卻不足10宗。郭現依靠綜緩連租金津貼5,000多元過活，扣除約3,000元租金，只剩約2,000元作生活費，而每次司法覆核費用為1,045元，「我慳得好緊要，一日唔可以用超過100蚊，但我慳得好有營養」。他每天將牛油果、香蕉等配以鮮奶打成飲料，分為早、晚兩餐。以往他曾到長洲燒烤爐旁尋找剩食，「依家少咗人入嚟，無得執喇！」
節衣縮食卻屢戰屢敗，郭仍屢敗屢戰，「相信公義就唔理得咁多，好似烏克蘭明顯係以卵擊石，但一定要奮鬥」。他認為敗訴不代表未能撼動政府，2006年運輸署批准新渡輪加價以長洲航線補貼其他虧損的航線，郭卓堅認為三條離島航線獨立經營，不應互相補貼，入稟挑戰敗訴，但署方承諾往後渡輪加價申請分開計算，「政府有時唔可以落面得太緊要，公道自在人心，我打每一樣嘢從來都無為自己打過一次，都係為民請命」。
「每朝 6 點都睇吓有無人敲門」
今年11月，郭再就疫苗通行證及「安心出行」措施申請司法覆核，質疑有關追蹤措施違反《香港人權法》，「同免針紙一樣，盧寵茂有無權咁做先？呢單應該贏㗎！」覆核王說罷，眼神卻流露一絲唏噓，「不過打埋呢個就唔再打喇」。
「打盧寵茂嗰時，我日日（朝早）6點鐘睇吓有無人敲門」，郭原認為打民生議題會較安全，但社會形勢風高浪急，加上年事已高難免心存隱憂，「再打落去終有一日搵到理由等你坐監，你想唔想喺監房過一世吖？」他每天緊貼時事，越看越灰心，「想離開香港，每日聽到啲新聞都覺得好不知所謂」。
覆核王將退下火線，近日一名20歲少年因兩個月內被警方多次查身份證入稟申請司法覆核，質疑警方侵犯人權和違憲。郭卓堅樂見仍有市民願意行使覆核的權利，「邊條違反咗《基本法》同香港法律，就有得打！要相信『楚雖三戶，亡秦必楚也』」。
