2022十大香港娛樂大事回顧 威威爆紅除罩即玩完 袁嘉敏爆Seed轟鍾培生父子

2022十大香港娛樂大事回顧 威威爆紅除罩即玩完 袁嘉敏爆Seed轟鍾培生父子
2022十大香港娛樂大事回顧 威威爆紅除罩即玩完 袁嘉敏爆Seed轟鍾培生父子

2022年即將過去,除咗個人回顧,點少得人來人往嘅娛樂圈?今年香港娛樂圈發生唔少大事,而家就同大家回顧一下今年香港十大娛樂新聞啦!

TVB與ViuTV電視大戰
ViuTV近年憑《全民造星》系列及自家劇集穩佔市場一席位,與TVB經常傳出搶收視消息。今年5月,TVB與ViuTV展開電視大戰,TVB為對撼ViuTV郭羨妮回歸電視圈之作《冥冥之中》而硬Cut 5集《雙生陌生人》,播放《十八年後的終極告白2.0》。10月份,ViuTV推出兩套由MIRROR成員主演劇集《野人老師》、《季前賽》,TVB就即時變陣,改由《美麗戰場》對撼。

《季前賽》劇照
《季前賽》劇照 (ViuTV Facebook)
《美麗戰場》劇照
《美麗戰場》劇照

MIRROR演唱會意外
MIRROR今年7月於紅館舉行演唱會,28日場次發生嚴重意外,舞台上方嘅巨型屏幕突墜下,壓傷舞蹈員,其中COLLAR成員So Ching男朋友阿Mo(李啟言)傷勢嚴重,需要接受呼吸造口手術,頸部以下仍未能郁動。直至11月,政府公布調查報告,指工程公司虛報舞台組件重量,而警方先後拘捕4男1女。阿Mo現已轉院,Mo爸近日嘅代禱信透露,阿Mo感官神經得到刺激,開始有一點反應。

MIRROR
MIRROR (MIRROR IG)

娛樂節目因疫情延期或取消
香港於2022年頭爆發第五波疫情,隨著政府收緊社交距離措施,唔少舞台劇、藝人演唱會都被迫取消或延期,例如黃子華及潘燦良舞台劇「最後禮物」、張敬軒、Aga、周杰倫、Avril Lavigne演唱會等等。

《The Next 20 Hins Live in Hong Kong 張敬軒演唱會》
《The Next 20 Hins Live in Hong Kong 張敬軒演唱會》

林作挑機陳凱琳細佬
陳凱琳 (Grace)與龍鳳胎細佬Derek一向被指唔似爸爸親生,Derek於父親節PO出與爸爸合照引起網民熱烈討論,而林作更公開挑機,指只要對方願意同爸爸進行DNA比對,證實係父子嘅話,就會俾100萬佢,順便驗埋係咪有印巴血統。而陳家大家姐Joyce親自回覆林作,表示肯驗但嫌錢少,林作加碼到500萬,陳凱琳又以五人全家福反擊林作。

陳凱琳爸爸 & 細佬Derek
陳凱琳爸爸 & 細佬Derek (Derek IG)

威威爆紅後星途極速玩完
荃灣豬肉佬阿威因貌似AK與MC爆紅,又接拍廣告、開設YouTube頻道、商場粉絲見面會,就連日本媒體Techinsight都以「帥氣豬肉店店長,人氣不遜偶像」為題介紹阿威。不過之後,阿威被指愈來愈商業化,又被爆出曾經做過傳銷,除口罩揭真面目後,更流失唔少粉絲,有品牌為阿威推出限量閃卡,仲惹起公關災難。早前有人指佢回歸平淡生活,已經重返豬肉檔工作。

「荃灣豬肉檔AK」劉宋威(阿威)
「荃灣豬肉檔AK」劉宋威(阿威) (劉宋威IG)

譚俊彥林夏薇首封視帝視后
無綫年度盛事《萬千星輝頒獎典禮2021》於今年初舉行,每一屆嘅視帝及視后之爭最為矚目,而喺《萬千星輝頒獎典禮2021》譚俊彥憑《換命真相》勇奪視帝及「馬來西亞最喜愛TVB男主角」,成為雙料得主;視后方面,則由《七公主》林夏薇撼贏大熱門鍾嘉欣封后。

譚俊彥林夏薇首奪視帝視后
譚俊彥林夏薇首奪視帝視后

港產片發圍
2022年港產片大獲好評,屢破票房佳績。當中不得不提由古天樂擔任總監製及主演、香港首部科幻動作片《明日戰記》,電影耗資4.5億元打造,由製作至上映足足用咗10年時間,最終成為香港史上票房收入最高嘅華語電影。另外,喜劇《飯戲攻心》上映逾兩個月,票房已勁收7,300萬;另一喜劇《闔家辣》同樣深得觀眾喜愛,最終票房高達3,270萬;《阿媽有咗第二個》由毛舜筠、號召力驚人嘅姜濤及Jer柳應廷主演,最終票房大收4,100萬;由新晉導演何爵天執導、改編自2013年一宗轟動全港「逆子弒親案」嘅《正義迴廊》上映兩個月後,票房大收3,900萬,正評滿滿。

《明日戰記》
《明日戰記》 (明日戰記 Facebook)

COLLAR成軍
ViuTV選秀真人騷《全民造星IV》誕出新一代女團COLLAR,COLLAR喺1月出道嗰陣已經氣勢如虹,一班鏡粉嘅「前夫」就喺FB成立新群組「前夫反擊戰」,當時唔夠一日就有逾2.6萬人加入。而COLLAR出道短短3個多月就推出兩首團歌,亦成為廣告商新寵兒,5月更曾擔任張敬軒紅館演唱會嘉賓,不過So Ching為照顧於MIRROR演唱會意外受到重創嘅舞蹈員男友阿Mo(李啟言)而停工,至今COLLAR每次出席活動都唔齊人。

COLLAR
COLLAR (So Ching IG)

袁嘉敏炮轟鍾培生父子
袁嘉敏一向以34D導彈級身材聞名,近年無咩點喺熒幕亮相,但生活依然富貴;而4月時份袁嘉敏就突然喺IG疑似爆Seed炮轟「富三代」鍾培生父子,指自己過往一年如同噩夢,怒斥鍾培生及鍾父有「古怪要求」,大爆鍾培生主動開價1000蚊傾心事。近日,袁嘉敏再次拍片剖白與鍾培生關係,表示當日失咗啲理智,最大嘅錯都係自己,又重申自己並非貪錢。

袁嘉敏
袁嘉敏 (袁嘉敏IG)
袁嘉敏
袁嘉敏 (袁嘉敏IG)

Angelababy與黃曉明離婚
Angelababy(楊穎)與黃曉明過去常於社交平台高調曬恩愛,但近年愈來愈少互動,因而傳出早已離婚消息,直至1月二人透過社交網宣布離婚,結束6年半婚姻:「感恩過去所有,未來仍是家人!」,並表示會共同撫養仔仔小海綿。二人工作室發出黃曉明和Angelababy共同聲明,強調二人係和平分開,今後唔會再回應相關新聞。不過早前男方被爆與網紅葉珂拍拖,冇幾耐又被影到深夜到訪Angelababy嘅豪宅,二人復合嘅消息隨即被瘋傳。

Angelababy & 黃曉明
Angelababy & 黃曉明 (Angelababy Weibo)

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!