2023視后競爭激烈 佘詩曼強勢回巢拍《新聞女王》 有望做首個三屆視后？

每一屆嘅《萬千星輝頒獎典禮》，大家最關注嘅一定係視帝視后獎項花落誰家。雖然今年TVB仲未公佈提名名單，不過今年都有唔少女藝員喺劇集有不俗嘅表現，被網民推舉做視后。

唔經唔覺嚟到10月，距離公佈《萬千星輝頒奬典禮》提名名單越嚟越近，今年被網民熱捧嘅做視后就有唐詩詠《隱形戰隊》、胡定欣《破毒強人》、龔嘉欣《靈戲逼人》、林夏薇《寵愛PET PET》及蔡思貝《你好，我的大夫》，另外仲有佘詩曼今年以台慶劇《新聞女王》強勢回歸TVB，所以今年視后寶座競爭可以話係相當激烈，有人隨時3度封后，亦有人有機會首奪視后，大家拭目以待喇！

睇返過去26屆最佳女主角，有4位女星試過兩度封后，分別係汪明荃（2001年《婚前昏後》及2005《我的野蠻奶奶》）、鄧萃雯（2009年《巾幗梟雄》及2010年《巾幗梟雄之義海豪情》）、佘詩曼（2006年《鳳凰四重奏》及2014年《使徒行者》）及胡定欣（2015年《鬼同你OT》及2016年《城寨英雄》）。而最年輕及最年長得主分別係蔡少芬以25歲之齡喺1998年憑《天地豪情》及2019年憑《鐵探》榮升視后嘅59歲惠英紅。

另外，不過唔知大家有冇留意，總係有幾個好好演技嘅藝員成日差咁啲攞獎運，而食白果最多嘅陪跑女藝員就有郭可盈（13次）、鍾嘉欣（12次）、吳美珩（11次）、郭羨妮（11次）及滕麗名（11次）。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！