2024風生水起｜麥玲玲批吳若希夫妻磨擦多 馮盈盈受情傷拒拍拖？

風水賀年節目《2024風生水起》由薛家燕帶領許文軒、陳懿德及徐文浩擔任主持，聯同多位堪輿學家帶來相關玄學資訊：李丞責師傅遊走多區「行大運」為區內解構風水格局、麥玲玲師傅為觀眾指點迷津，大講開運攻略、元海師傅教觀眾運轉乾坤、唐碧霞師傅揭示龍年興旺密碼、黃楚淇師傅則聚焦汽車風水、關帝文化等範疇。節目第四至第七集播映日期為今日（5日）至周四（8日）晚10點半翡翠台，第八集將於年初二（11日）晚10點翡翠台播出。

今晚（5日）播出一集邀請到吳若希（Jinny）擔任節目嘉賓，麥玲玲師傅指吳若希八字命格多衝擊，同任何人結婚都一樣會磨擦多，又叮囑佢搵屋要謹慎同埋指屋內唔好放太多公仔免招惹是非：「唔好揀鬧交嘅屋，或擺設上多衝擊。你本身命格是非多，躺著也中槍，小就是非，大就官非。」另外，麥玲玲師傅提醒吳若希要留意主人房及廚房佈局，例如主人房廁所係咪沖睡床，橫沖影響健康，直沖則影響夫妻感情；廚房不宜太多反光物料，折射灶頭容易出現三角關係。麥玲玲師傅更向吳若希教路，如果要增強讀書運，則要將女兒書枱移向西北文昌位及擺放一種植物，以增強讀書運。

至於後日（6日）播出「龍年開運搵師傅」一集，則搵嚟馮盈盈做嘉賓。馮盈盈直言而家唔想拍拖，麥玲玲師傅回應指：「咁一定係受咗情傷！」，引起現場一陣譁然。由於馮盈盈現正修讀香港大學食品產業管理市場營銷碩士課程，佢就向麥玲玲師傅請教增強文昌運妙法，表示自己上學期成績奪A-，希望下學期可以奪 A+及以一級榮譽成績畢業。麥玲玲師傅表示馮盈盈嘅面相額頭飽滿明亮、耳朵輪廓分明，一定係學霸；更指雖然馮盈盈今年沖太歲，但表示藝人犯太歲反而機會更多，建議佢多現身幕前，幫助提升名氣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！